Тений идалык тӱҥалтыш гыч Марий Элыште илыше 2700 утла еҥ ончыкылык страховой пенсийжын кугытшо дене палдарыме уверым налын. Тудым 45 ийым темыше пӧръеҥ ден 40 ияш лийше ӱдырамаш-влаклан Кугыжаныш услуго портал гоч личный кабинетышкышт колтымо.
Социальный фондын уверыштыже страховой стажым, тиде жаплан погымо пенсий коэффициентын чотшым да нине показатель негызеш шотлен лукмо пенсийын кугытшым ончыктымо.
Тыгай шотан увер граждан-шамычлан пашам пуышын увержым тергаш да шке пенсий правам ончылгоч аклаш йӧным ышта.
Кугыжаныш услуго порталыште учётный записьым ыштыдыме еҥ-влак пенсийым чумырымо нерген уверым Социальный фондын клиент службылаштыже налын кертыт.
М.ИВАНОВА ямдылен
Фотом интернет гыч налме
