Россий президент пелен Марий Элын полномочный представительже Ольга Бадма-Халгаева «Российын лидерже-влак. Политике» всероссийский конкурсышто сеҥышыш лектын.
Тидын нерген тудо шкенжын воткыл лаштыкыштыже увертарен. Ты конкурс Россий президентын кӱштымашыже почеш эртаралтеш да элнан ончыклыкшылан ӱшаным налын кертше ончылъеҥ-влакым ойыраш полша. Тений тушко 17 тӱжем еҥ ушнен, 105-ше гына финалыш лектын. «Мемнан кокла гыч кажныже элнам сайракым да виянракым ыштынеже. Ме чылан пырля пеҥгыдын ончыко каена, мыят шкенан эллан вияҥмашкыже шке надырем пыштем манын ӱшанем», – серен полномочный представительна.
Фотом О.Бадма-Халгаеван воткыл лаштыкше гыч налме.
