Марий Эл вуйлатыше Юрий Зайцев паша дене Москваш мийымыж годым РФ Правительстве председательын алмаштышыже Дмитрий Патрушев дене вашлийын.
Вашлиймаште республикысе агропромышленный комплексын да ял кумдык-влакын вияҥмышт, уржа-сорла тургымым мучашлыме да Марий Элыште «Экологий» национальный проектым илышыш шыҥдарыме дене кылдалтше йодыш-влакым ончен лектыныт.
Юрий Зайцев «Оздоровление Волги» федерал проект кышкарыште эрыктыше сооружений-влакым уэмден олмыктымо пашам мучашлыме да ты шотыштак мом эше ышташ лийме нерген палдарен.
Дмитрий Патрушев шке велжым палемден: Марий Эл ончыкыжымат «Вода России» федерал проект кышкарыште эрыктыше сооружений-влакым уэмден олмыктымо дене кылдалтше мероприятийлаште участвоватлен кертеш. А тушко йодмашым 2025 ий тӱҥалтыште пуыман.
Марий Эл вуйлатышын пресс-службыжын уверже негызеш Светлана Носова ямдылен.
