Йошкар-Оласе 31-ше №-ан школышто кадет толкын 2021 ийыште вияҥаш тӱҥалын. Тений кадет-влак икымше гана Шинчымаш кечым палемденыт.
Каласыман, специализироватлыме классым почмо шонымаш дене школын администрацийже Марий Эл УФСИН-ыш миен, тушто тиде тӱҥалтышым сайлан шотленыт. Ӱмаште идалык мучаште уголовно-исполнительный системын икымше кадетше-влак присягым пуэныт. Тенийысе Шинчымаш кечын тунемше-влакым Марий Эл УФСИН-ым вуйлатышын алмаштышыже Евгений Швецов толын. Торжественный линейке годым тудо «УИС-ын эн сай кадетше» нагрудной знакым эртыше тунемме ийыште ойыртемлатше кум ӱдыр-рвезылан – Артём Ковешниковлан, Анастасия Бутениналан да Милена Романовалан – кучыктен.
Тидын деч вара наказанийым шуктышо системыште пашам ыштыше-влак тунемше-шамычлан служебный пийым ашныме дене кылдалтше выездной урокым эртареныт.
Г.Кожевникова
Фотом Интернет гыч налме
