17-18 майыште Йошкар-Олаште «Марий Элын самырык талантше-влак» ХII конкурс эртен.
Тудо кумдан палыме землякна, композитор Андрей Эшпайын шочмыжлан 100 ий теммылан пӧлеклалтын.
– Конкурсым кугу событийлан шотлыман. Тудо самырык-влак коклаште талантан-шамычым ужаш да у шӱдырым чӱкташ полша. А тенийысе конкурснам чапланыше композитор, гений Андрей Яковлевич Эшпай лӱмеш эртарымым кугу чаплан шотлем, – палемден Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов.
Йодмашым 160 еҥ пуэн, а конкурсышто тӱрлӧ номинацийыште чылаже 130 участник мастарлыкым ончыктен. И.С.Палантай лӱмеш тӱвыра да сымыктыш колледжын Андрей Эшпай лӱмеш кугу концерт залыштыже музыкант-влак тӱрлӧ жапысе композитор-шамычын семыштым скрипка, виолончель, гобой, домр, кларнет, фортепиано, аккордеон да моло семӱзгар дене шоктеныт. Академический вокал дене кок участник ушнен. Йошкар-Оласе 7-ше №-ан йоча сымыктыш школын тунемшыже Елизавета Свинчукова «Садко» опер (Н.Римский-Корсаков) гыч Волхова кугыжа ӱдырын арийже ден Эллина Архипован «На кобылке быстроногой…» йомакше гыч мурым мурен. Колледжын студентше Роман Лебедев «Времена года» ораторий (Н.Гайдн) гыч Симонын арийже ден Андрей Эшпайын «Нет меня счастливее» опереттыж гыч Володян арийжым йоҥгалтарен.
Кажне произведений ушышто тӱрлӧ образым шочыктен, шонаш таратен, а марий семмастарна-влакын произведенийышт гоч нунын кӧргӧ чон поянлыкыштым шижаш, кундемнан мотор вер-шӧржӧ да пӱртӱсшӧ дене кугешнаш йӧн лийын.
Конкурсышто йоча сымыктыш, музыкальный школлаште, колледж ден музучилищылаште, вузышто тунемше-влак мастарлыкым ончыктат. Тидыже эн шергылан шотлалтеш.
Эн ойыртемалтше-влак гала-концертыште мастарлыкыштым ончыктеныт.
Тушко погынышо-влакым Тӱвыра, савыктыш да калык-влакын пашашт шотышто министрын алмаштышыже Михаил Матвеев саламлен, Марий Эл искусствын сулло деятельже, конкурслан тӱҥалтышым пыштыше Раиса Лукияновна Яшметовалан таум каласен.
Мероприятийын унаже – пианист, композитор, Моско оласе «Геликон опера» музтеатрын концертмейстерже, «Марий Элын самырык талантше-влак» икымше конкурсын лауреатше Сергей Чечётко.
– Шижде кумло кок ият эртен кайыш. Тунам жюри председатель Андрей Яковлевич Эшпай лийын. Тудо поэт Борис Пастернакын ойжым каласен: «Талант – ик увер гына, да тудо эреак у». Тиде ой конкурснан лӱмжыланат моткоч келшен толеш.
Мый кажне туныктышемлан кугу таум каласем. Национальный президент школ-интернатыште икымше педагогем Раиса Лукиановна Яшметова дене кызытат кылым кучена, тудо мыйым кызытат туныкта. Тыгак тау мутем музыкальный училищыште опытан педагог Валентина Герасимовна Иванушкиналан, Озаҥ оласе консерваторий гыч Флора Ибрагимовна Хасановалан лиеш, – палемден Сергей Чечетко да, фортепиано воктеке шинчын, икмыняр произведенийым уло кумылын колышташ темлен.
Сеҥыше-влаклан «Шкет шоктымо-мурымо сымыктыш, композиций», «Куштымаш сымыктыш» да «Сӱретсымыктыш» номинацийлаште ойыреныт. Нунылан окса премийым кучыктеныт.
Конкурс нерген икмыняр участникын шонымашыж дене палдарем.
Руслан МИНГАЗОВ, Медведево посёлкысо К.Смирнов лӱмеш йоча сымыктыш школын тунемшыже:
– Тиде конкурсышто мый икымше гана улам. Тудлан кужу жап ямдылалтме. Сеҥышыш лекмем ончыкыжымат тыршен тунемаш, сценыште шкем ӱшанлын кучаш туныкта.
Мылам гобой дене семым лукташ келша, ончыкыжым кугу музыкант лияш шонем.
Михаил СОКОЛОВ, Озаҥ оласе Н.Г.Жиганов лӱмеш кугыжаныш консерваторийын студентше:
– Конкурс кумдан чапланыше музыкант, композитор-влак ончылно йӧратыме семӱзгарым шокташ, шкем терген ончаш да мастарлыклан акым палаш йӧным пуа. Баяным тӱҥалтыш класслаштак шокташ тунемынам да тачат тудо эн ӱшанле йолташем. Вуз деч вара иктаж оркестрыште шокташ шонем.
Игорь Шарнин, И.С.Палантай лӱмеш тӱвыра да сымыктыш колледжын студентше:
– Конкурсышто шоктымо кок произведений гыч иктыже Андрей Эшпайын «Венгерские напевы» ыле. Андрей Яковлевичын произведенийжым шокташ – кугу куан. Композитор пӱртӱс образым, калык илыш ойыртемым почеш. Тудо ятыр тӱрлӧ образым ончыкта, а нунышт ты циклыште моткоч сайын кылдалтыныт: кечан Венгрий мучко коштын савырнен кертам.
Скрипкам шокташ изинекак шӱмаҥынам да ты мастарлыкым Кужэҥер посёлкысо сымыктыш школышто пойдаренам.
Роман ЛЕБЕДЕВ, И.С.Палантай лӱмеш тӱвыра да сымыктыш колледжын студентше:
– Конкурс жапыште тӱрлӧ семӱзгар дене шоктышо талантан ӱдыр-рвезе-влак дене палыме лийынам. Илышем акадмический вокал дене кылденам гынат, мастарлыкем нунын денат таҥастарем, вет кажнынан «пашаче» ӱзгарна тӱрлӧ. Тыге таҥастарыме пайдале да мыланна кушкаш полша.
Пагалыме композитор Андрей Эшпайын музыкшо неле, тӱрлӧ. Тидын денак тудо мыланем келша.
СПРАВКЕ
Конкурс 1993 ий годсек кум ийлан ик гана усталык шӱлышан самырык-влакым иктыш чумыра. Тиде жапыште моткоч шуко ӱдыр-рвезе ты сымыктыш корным эртен да республикыштына веле огыл, Российын тӱрлӧ кундемыштыже але вес элыште мастарлыкым шуара, пашам ышта да тачысе кечылан калыкыште палыме еҥ улыт.
Алевтина БАЙКОВА
Авторын фотожо
