24 июньышто республикыштына Марий Эл Конституцийын 30-шо идалыкшым палемденыт.
Регионын Конституцийжым приниматлымылан 30 ий темме лӱмеш торжественный заседаний Конгресс полатыште эртен. Тиде документ кугыжанышлыклан, демократийлан да правопорядкылан тӱҥалтышым, вияҥаш ӱшанле негызым пыштен.
«Марий Эл Республикын Конституцийже – тиде тӧртык ойпого веле огыл, тыгак икоян улмым, марий калык йӱлам пагалымым, кажне гражданинлан права ден эрыкым пуымым ончыктышо символ. Тудын полшымыж дене ме, шуко нациян кугу элнан ужашышкыже савырнен, ойыртемалтше тӱвыранам, йылмынам да шкешотан улмынам арален толына», – торжественный мероприятийым почмыж годым палемден республикын вуйлатышыже Юрий Зайцев.
Мероприятийыш толшо-влакым тыгак Марий Эл Кугыжаныш Погынын председательже Михаил Васютин саламлен: «Марий Элын тӧртык-влакым лукмо кучемыштыже чыла 30 ийыште икымше калык депутат-влакын негызлен кодымо эн сай йӱлашт аралалт кодын. Республикын Конституцийже тачысе кечылан да икмыняр лу ийлан тӱҥ корным палемден, тудо кызытсе илышын чыла йодмашыжлан келшен толеш. Тидын дене кугешнашат лиеш».
Россий Федераций Федеральный Погынымашын Федераций Советшын председательжын алмаштышыже, Марий Эл кугыжаныш кучемын исполнительный органже деч представитель Константин Косачев документым ыштымаште тыршыше-влаклан тауштен.
Россий Федерацийын Конституцийже да регионысо документ кокласе кыл нерген ойлымыж годым палемден: «Конституций мут деч посна шукталтеш гын, ме ончыко ӱшанлын ончена – тиде федеральный кӱкшытан тӱҥ законна дене кылдалтын. Тудо ынде 30 ий утла элыштына лийше чыла тӱрлӧ пуламырым чарен шогалта, да тиде, мутат уке, Марий Эл Республикын Конституцийже нерген. Тудо республикланна тыгакак ӱшанлын вияҥаш, ӱшанлын ончыко каяш полша».
Мероприятийыште Федераций Советын обороно да лӱдыкшыдымылык шотышто комитетшын председательжын икымше алмаштышыже, Марий Эл кугыжаныш кучемын тӧртык-влакым лукмо органже деч представитель Сергей Мартынов лийын.
«Конституцийым приниматлыме кече деч вара 30 ийыште ме республикын тӱҥ законжын жапын простажак огыл тергымашыжым эртымыже, шкенжым юридический велым сайын негызлалтше документ семын ончыктымыж нерген пеҥгыдын ойлен кертына», – манын тудо.
Тиде кечын Юрий Зайцев регионын законодательствышкыже кугу надырым пыштымылан, тыгак республик Конституцийын 30-шо идалыкше лӱмеш Марий Эл вуйлатышын администрацийжым вуйлатышын икымше алмаштышыже Рудольф Золотарёвлан, Конституционный комиссийын председательже Владислав Зотинлан, Конституционный комиссийын йыжыҥъеҥже Светлана Наумовалан, Конституционный Погынымашын участникше-влак Григорий Пейсахович ден Даиль Шагиахметовлан, Марий Эл Конституционный судын судьяже Зосим Эргубаевлан Тауштымашан серышым кучыктен.
Марий Эл вуйлатышын пресс-службыжын уверже негызеш Маргарита Иванова ямдылен.
