Марий Эл гыч кинорежиссёр Андрей Огородниковын «Онаеҥ» фильмжылан семым возышо Григорий Архиповын композицийже-влакым ынде чыла музыкальный платформышто колышташ лиеш.
«Айдемын Ото» струнный, ударный да кок валторнлан сюитым Э.Сапаев лӱмеш Марий кугыжаныш опер да балет академический театрын симфонический оркестрже йоҥгалтара. Сюжет почеш Российын эрвелныже илыше келге историян да аутентичный национальный тӱвыран калык нерген ойлалтеш. Моткоч ойыртемалтше чимарий йӱлам арален кодымыжлан да кучен илымыжлан тудым «Европын пытартыш язычникше» семын аклат. Марий калыкын вераже пӱртӱс вий дене кылдалтын, а тӱшка дене кумалын йодмо мутшым Ош Кугу Юмо марте лач Онаеҥ намиен шукта.
Могай вара композиций-влакым колышташ лиеш? Мо нерген нуно улыт, вуймутышт гычак умылена: Ӱжмаш; Тул, вӱд, кӱртньӧ йӱк; Тӱҥалтыш; Юмо деке Корно; Пӱртӱс Йоча; Ала тиде Юмо полша; Кумалтыш Надыр; Касартышмут деч ончыч; Ӱшан; Чылаштлан пуалтын; Тыгай радам; Тымык; Кумалтыш мут; Чон йӱк; Пӱралтын; Онаеҥ.
Ончыктен кодыман, чыла семым М.Шкетан лӱмеш марий национальный драме театрыште возеныт.
Светлана Носова
Снимкыште: у пашан тӱжвал сынже.
Фотом фильмын воткыл лаштыкше гыч налме.
