Пайрем дене!
Омым коден, фермыш вашкат
Ялозанлык пашам ышта – ял ила. Но ялозанлык сатулан, поснак пырчылан да пакчасаскалан, ак волымо-кӱзымӧ нелылыкым гына луктеш. Шӧр акым пеҥгыдын кучаш тыршыме гына ӱшаным ешара. Санденак шӧр лектышым кугемден толаш, вольыкым ешараш тыршена. Тидын кӱшешак машина ден трактор паркым уэмдаш, сай урлык пырчым налаш шонена.
Вольык ончымо пашан ик тӱҥ ужашыже ӱдырамаш-влакын вачышт ӱмбаке возеш. Нуно, тамле омым коден, пеш эр фермыш вашкат, кастенат лӱштен пытарымеш кучалтыт. Кызыт ялыште вольык ончышым муашыжат куштылго огыл, санденат улшыштым аклышаш да пагалышаш улына. Роза Алексеевна Волкова – комплекс начальникна, тудак вольыкым тӱжаҥдыме, зоотехний да ветеринарий пашам шукта. Алевтина Андреевна Сандакова ден Роза Николаевна Рожкова уста дояркына улыт. Валентина Аркадьевна Жилина кӱлеш годым доярке-влакым алмашта, эше презым онча. Тыгай-влак дене кугешныде ок лий.
Чылаштлан таза лияш, тыршен ышташ тыланем. Паша кумылышт ынже воло, пиалан лийышт, еш илышышт куандарыже. Ӱдырамаш пайрем дене!
Лев ГЛУШКОВ,
Шернур район «Лажъял» СПК СХА-н председательже.
Снимкыште: Алевтина Сандакова, Роза Волкова, Роза Рожкова, Валентина Жилина.
Озанлык деч налме фото.
Мужыр лаштыкым Юрий ИСАКОВ ямдылен.
