Марий Эл Правительстве пӧртыштӧ Олык Ипай лӱмеш кугыжаныш молодёжь премийым пуымо шотышто заседаний лийын.
Пуымо чыла проектым конкурсыш пурташ пунчалым луктыныт. Заседанийыште паша планым пеҥгыдемденыт. Тудын дене келшышын, октябрьыште участник-влак проектлаштым комиссийлан презентоватлаш тӱҥалыт.
Тений комиссийыш чылаже 68 претендент деч 40 йодмаш пурен.
Литератур, искусство да архитектурышто паша дене ойыртемалтмылан номинацийыште 18 произведенийым ончаш тӱҥалыт.
Шанче, техник пашаште да производствышто кугу кӱкшытыш шумылан номинацийыш 11 пашам пуымо.
Мер да социальный кӱлешан пашам ойыртемалтшын шуктымылан номинацийыште тыгак 11 паша ончалташ тӱҥалеш.
Кажне номинацийыште вич сеҥышылан 40 тӱжем теҥге дене окса надыр пуалтеш.
Иктешлымашым тений декабрьыште ыштат.
