Йошкар-Ола администрацийыште вӱдшор пагытлан ямдылалтме да тудым аврий деч посна эртарен колтымо йодышым каҥашеныт.
Заседанийыште Россий МЧС-ын Марий Элысе управленийжын специалистше-шамычат лийыныт.
Синоптик-влакын ойлымышт почеш тений январь-февральыште лум нормо деч 2,4 пачаш утларак возын, февральыште 2,9 пачашышкат шуын. Тыгай сӱрет пытартыш гана 1936 ийыште лийын.
«Город» АО-н пашаеҥже-влак кызыт вӱд йоген кайыме таве-влакым, вӱд йоген кайышашлык верлаште иян лумым эрыктат. Вӱдым тулен лукташ кучылташ лийше спецтехникымат оза-влак ямдылат. Оласе гидротехнический сооруженийлаште плановый пашам шуктат.
Олан мэржын пашажым жаплан шуктышо Антон Трудинов управляющий компаний ден ТСЖ вуйлатыше-влаклан шуко пачашан пӧртласе подваллаште вӱд ынже пуро манын эскераш да тушко логалаш мешайыше чарак уло гын, пачер оза-влаклан кораҥдаш кӱлмӧ нерген увертараш йодын.
Йошкар-Ола администрацийын воткыл лаштыкше гыч налме.
