Йошкар-Олаште илыше кок еҥ телефон дене ондалкалыше-влаклан кодшо кечылаште чылаже 1 миллионат 602 тӱжем теҥгем «пӧлекленыт».
Туткарыш логалмыж нерген полицийыш эн ончычак 55 ияш ӱдырамаш увертарен. Ойлымыж почеш, палыдыме-влак тудлан икмыняр кече йыҥгыртеныт. Нуно пуйто правам аралыше органлаште пашам ыштат манын ойленыт да банк картше гыч ала-кӧмыт оксажым шканышт кусараш тӧчат, каласеныт. Тидым чарен шогалташ «зеркальный займ» манмым налаш кӱштеныт. Ӱдырамаш ӱшанен да лӱдмыж дене 1 500 000 теҥге кредитым налын, вара мошенник-шамычын каласыме реквизит почеш колтен.
45 ияш пӧръеҥлан пуйто финанс контроль специалист йыҥгыртен да «посна счётлашке» 102 тӱжем теҥгем колташ ӱшандарен.
* * *
Медведево районышто илыше 33 ияш ӱдырамашымат телефон мошенник-шамычак ондаленыт.
Полиций пашаеҥ-влаклан палдарымыж почеш, тудлан пуйто Российын почтыжын пашаеҥже йыҥгыртен. Пӧръеҥ каласен: ӱдырамаш лӱмеш заказной серыш толын. Тудым налаш манын, смс дене мийыше кодым каласыман. Нимынярат кокытеланыде, тудо тыгак ыштен.
Икмыняр жап гыч Роскомнадзор пашаеҥ йыҥгыртен да кызыт гына тудын дене аферист мутланен манын каласен. Пуйто тиде еҥ Кугыжаныш услуго порталыште личный кабинетше деч кодшым пален налын, да ынде вес еҥ-шамыч тудын лӱмжӧ дене займым оформитлынешт.
Тылеч вара мутланымашке «банкын лӱдыкшыдымылык службо пашаеҥже» ушнен. Тудо ӱдырамашлан «резерв счётлашке» оксам кусараш кӱштен. Умбакыже QR-кодым колтен. Ӱдырамаш тудым сканироватлен да кредит карт гыч палемдыме реквизит почеш оксам колтен. Тыге 130 тӱжем теҥге оксам палыдыме еҥлан «пӧлеклен».
Нине кум факт шотыштат уголовный делам тарватыме.
Тыгай сынан азапыш логалаш огыл манын, МВД ушештара:
- йыҥгыртыше-влак банк пашаеҥ, правам аралыше органлаште тыршыше, мобильный кыл оператор улмышт нерген ойлат гынат, палыдыме еҥ-влаклан смс дене толшо кодым да парольым ойлыман огыл. Тиде увер дене нуно банк счётлашкыда пурен да оксадам шканышт кусарен кертыт;
- палыдыме еҥын йодмыж почеш оксам «безопасный счетыш» кусарыман огыл;
- банк картын тупынь велныже возымо цифрым, тыгак парольым иктыланат каласыман огыл;
- финанс-кредит учреждений-влакын пашаеҥышт картын данныйже ден смс дене толшо кодым телефон дене йыҥгыртен огыт йод;
- рашемдаш манын, лучо банк картыште, банкын официальный сайтыштыже але услугым пуымо нерген ыштыме ойпидышыште возымо телефон номер дене йыҥгырташ.
Любовь Камалетдинова
Авторын фотожо
