Марий Элым вуйлатыше Юрий Зайцев ден Кугыжаныш Думын депутатше Сергей Казанков республикым вияҥдыме тӱҥ йодыш-влак нерген мутланеныт.
Нуно кӱлешанлан шотлалтше шуко направлений, ты шотыштак регионысо бюджетын балансированностьшо да экономикым эшеат пеҥгыдемдыме, шотышто ик шонымашке шуыныт.
Парламентысе ӱлыл палате депутатын ик эн кугу задачыже – республикыш федеральный программе-влакын средстваштым кондаш, палемден Юрий Зайцев. Мутшо почеш, Кугыжаныш Думысо еҥна-влак дене пашам ваш мутланен ыштымылан кугу тӱткыш ойыралтеш.
«Кызыт регионысо арня эрта. Мутат уке, мыланна уло мо нерген мутланаш. Мый Кугыжаныш Думо кӱкшытыштӧ каҥашаш лийме йодыш, проблеме, ала-могай тат-влак нерген каласкалем. Таче уло кумылын пашам ыштена. Нине йодыш-влакым илышыш пурташ полшышо могай-гынат пунчал ден планым садак муына манын ӱшанем», – палемден Марий Элым вуйлатыше.
Кызыт бюджетыш пуртымо тӧрлатымаш-шамычым ончена, сандене финансированийым могай направленийла дене пырля йодаш кӱлмым рашемдыман, темлен Сергей Казанков.
«Юрий Викторович, тендан республикын кучемышкыже толмыда дене бизнесын еҥже-влак деч регионышто сӱрет саемме, пашам лӱдде ышташ лийме нерген утларак да утларак колам. Сандене мемнан дене амалкалче-влакын радамышт кушкын толеш. Республикышкына Чуваший да Татарстан гыч толнешт – тиде пеш сай. Бюджетыш пуртымо тӧрлатымаш-влакым ончымо жапыште мыланна могай направленийла дене финансым пырля йодаш кӱлмым умылаш кӱлеш, потомушто субъектлан шуко полномочийым пуат, а финансирований кызытеш окшакла», – манын Сергей Казанков.
Кугыжаныш Думо депутатын шонымыж почеш, Марий Эллан экономике велым вияҥме шырым шотышто кугу регион-шамыч дене ик кӱкшытыштӧ лияш кӱлеш.
Марий Элым вуйлатышын пресс-службыжын уверже негызеш Маргарита ИВАНОВА ямдылен
