УВЕР ЙОГЫН

ОКСА ШОТЫМ ЙӦРАТА

Марий Элысе селалаште да яллаште илыше пенсионер-влак финанс грамотыштым нӧлтат.

Республикыштына «Пенсионер-влаклан финанс азбуко» сотемдарыме проект стартым налын. Тудо Марий Эл правительствын полшымыж дене Россий банкын Марий Элысе пӧлкажын, Россий Федераций Социальный фондын регионысо пӧлкажын да Марий кугыжаныш университет пеленысе Кумшо ийготын университетшын тӱҥалтышышт дене илышыш пурталтеш.

Россий банкын Марий Элысе пӧлкажын экспертше ден сертифицироватлыме «ший» волонтёр-влак – Кумшо ийготын университетшын колыштшыжо-шамыч – регионысо чыла муниципалитетыште семинар ден мастер-класслам эртараш тӱҥалыт. Нуно пенсионер-влакым финанс мошеньык-шамычын ондалыме йӧнышт дене палдарат, кӱлешан финанс операцийлам шкан да лӱдыкшӧ деч посна шукташ, финанс услугым начарын ыштыме годым шке права верч шогаш туныктат. Вашлиймаш-шамычым Социальный фондын регионысо пӧлкажын районласе клиент службылаштыже пашам ыштыше кугурак тукымын вашлийын мутланыме рӱдерлаштыштат эртараш палемдыме. Икымше занятийым Советский посёлкышто эртарыме.

«Занятийлаште теорий дене кылдалтше материалым пуымо деч посна шинчымашымат тергена, мутлан, банкнотын подлинностьшым пеҥгыдемаш йодына. Вашлиймашке толшо-влак смартфонышт гыч ЖКХ-н услугыжлан тӱлен, оксам Писын тӱлымӧ системе гоч кусарен, ялысе кевытын кассыштыже наличный оксам налын ончен кертыт. Ончыкыжым финанс шинчымашым пуышо «ший» волонтёр-влак районлашке шке семыныштат лекташ палемдат», – каласкала Россий банкын Марий Элысе пӧлкажын управляющийже Александр Волков.

«Финансыште шинчымаш эре да чылалан кӱлеш, поснак – пенсионер-влаклан. Финанс грамотым нӧлтен, нуно доход ден роскотым виктарен, мошеньыкын ондалаш шонымыжым пален, сатулан интернет гоч лӱдыкшӧ деч посна тӱлен кертыт, – палемда Марий Эл правительстве председательын икымше алмаштышыже, регионышто Финанс грамот шотышто координационный советын председательже Михаил Васютин. – Проектыште «ший» волонтёр-шамычын участвоватлымыштат шергакан. Нуно шкеныштым у йыжыҥыште ончыктен да мом палымыштым иктаҥашыштлан умылаш лийшын каласкален кертыт».

«Кумшо ийготын университетшын колыштшыжо-влак сертификатым налыныт да ынде иктаҥашыштым Йошкар-Олаштат, республикнан районлаштыжат наставник семын туныктен сеҥат. Тиде Марий Эллан веле огыл, Юл кундем федеральный округланат – ӧрыктарыше опыт», – манеш педагогике науко доктор, профессор, Кумшо ийготын университетше пеленысе Регионысо «ший» добровольчестве рӱдерын вуйлатышыже Наталья Морова.

М.ИВАНОВА ямдылен

 

 

 

Опубликовать в Одноклассники

Добавить комментарий