Сентябрьыште лийшаш сайлымаште избирательный участкылаште веле огыл, тыгак дистанционно йӱклаш лиеш. Тиде да икмыняр моло нерген кодшо кечылаште «Марий Эл» увер агентствын студийыштыже республикысе Мер эскерымаш штабын экспертше-влак мутланеныт.
Тений сайлымаш кум кече – 6,7, да 8 сентябрьыште – эрта. Марий Эл Кугыжаныш Погыныш 52 депутатым, муниципал кӱкшытыштӧ 1301 депутатым сайлыман. 1 июльлан данный почеш 524579 еҥ йӱклен кертеш.
Избирательный кампанийыш ушнаш 7 партий кумылым ончыктен.
Марий Элыште 18 территориальный избирательный комиссий ден 491 участковый избирательный комиссий ышталтыт. Тиддеч посна эмлымверлаште да СИЗО-што кум избирательный комиссийым жаплан почыт.
Штабын экспертше-влакын палемдымышт почеш, марий парламентын составышкыже шым партий ден 200 кандидат шкеныштым темлыме кугу конкуренций нерген ойла.
– Мый тидым сай семын аклем. Еҥ-влакын ойырен налаш йӧнышт лиеш, – палемден Марий Элысе Мер палатын председательже Герман Дементьев.
Тыгайрак шонымашымак Мер палатын еҥже, эксперт Лариса Овчинникова каласен:
– Мыняр кандидат улмо конкуренций лийшаш нерген ойла. Икмыняр партий ий гыч ийыш вий-куатыштым ешарен толыт. Тиде сайлымаштат нуно шкеныштым чолган ончыктат манын каласаш лиеш. Избиратель-влак сайлымаш деч ончычсо кампаний, партий-влак кокласе кучедалмаш чынже дене кузе эртаралтмым ужыт, шонем.
Йыргешке ӱстел коклаште эксперт-шамыч дистанционный электрон йӱклымашын (ДЭГ) сай велжым палемденыт. Мутлан, Марий Элыште Калык фронт вуйлатыше Валентин Севастьянов палемден:
– Мемнан элыште информационный технологий моткоч виян, поснак кугыжаныш секторышто. Тыгай кӱкшытан кугыжаныш услуго тӱнямбалне ик элыштат уке. Мый Кугыжаныш услуго порталыште дистанционный йӱклымашым тестироватлымашым эртенам да моткоч келшен. Йӱклаш участкыш кайыме огеш кӱл. Адакшым кызыт самырык-влакын уло илышышт манме гай смартфонышто эрта.
– Чынжымак, тиде моткоч йӧнан. Илалше еҥ-влак кокла гыч кӧн участкыш мияш йӧнжӧ уке гын, нунат электрон йӱклымаш дене пайдаланаш полшышо еҥым муын кертыт, – ешарен Лариса Овчинникова.
Марий Элысе Мер эскерымаш штаб председатель, «Марий Эл» увер агентствын директоржоЕвгений Кузнецов палемден:
– Мемнан штабын тӱҥ задачыже – сайлымаш деч ончычсо кампанийын, йӱклымаш кузе кайымын, избирательный процессын закон дене келшыше да «вошткойшо» улмыштын независимый экспертизыжым эртарымаш.
Марий Эл Избиркомын палдарымыж почеш, дистанционный электронный йӱклымаш йӧн дене республикыште илыше 354 636 еҥын (тидыже 67,3 % лиеш) пайдаланаш праваже уло.
А.Антонов,
Л.Камалетдинова
А.Антоновын фотожо/ «Марий Эл» увер агентстве
