10 майыште Марий Элым вуйлатыше Юрий Зайцев паша аланыште социальный партнёрствым вияҥдымашке виктаралтше пунчалыш кидпалыжым пыштен.
Тиде документ исполнительный кучем, тыгак верысе шкекучем орган ден пашам пуышо-влаклан отраслевой ден территориальный келшыкым ыштыме аланыште, пашаеҥын социально-трудовой праваж дене кылдалтше нормативно-правовой актым, ты шотыштак коллектив ойпидышым, ямдылыме годым Марий Элын профсоюзшо дене пеҥгыдырак кылым кучаш темла.
Указыште тыгак пашам пуышо-влакым иквереш ушаш да пашаеҥ-шамычын первичный профсоюз организацийлаштым ышташ полшаш темлыме.
Ушештарена, Зависитлалтдыме профсоюз-влакын федерацийышт 2023 ийым Элыштына социальный партнёрствым пеҥгыдемдыме да вияҥдыме идалык семын увертарен.
Российыштына социальный партнёрство ынде 30 ий пашам ышта. Профсоюз-влак социально-трудовой кылым виктарыше тиде инструмент дене пашам ыштыше калыкын интересшым аралаш кӱлмӧ годым пайдаланат.
Регионыштына социальный партнёр-шамычын пашаштым социально-трудовой кылым виктарыме шотышто кум шӧрынан республиканский комиссий нерген закон 1999 ий гыч ворандара. Палемдыме комиссийын заседанийлаштыже пашадар дене кылдалтше, кадр ситыдыме, пашам муаш полшымо, производствышто сусыргымо да моло йодышлам ончат.
Пеҥгыдемдыме пунчал Марий Элыште социальный партнёрствым вияҥдыме да пеҥгыдемдыме пашам у кӱкшытыш лукташ йӧным ышта.
М.ИВАНОВА
