Эртыше арнян Марий Эл Кугыжаныш Погынын председательже Михаил Васютин Удмуртийыште эртаралтше икмыняр мероприятийыште участвоватлен.
6 ноябрьыште тудо Удмурт Республикын Кугыжаныш Советшын председательжын алмаштышыже — науко, шинчымаш да граждан обществын институтшылан вияҥаш полшымо комиссийын председательже Татьяна Ишматова дене вашлийын.
Коллеге-влак кок парламентланат келшен толшо ик паша йогын нерген мутланеныт, регион да федерал кӱкшытлаште законодательный виктышым йодшо пӱсӧ теме-шамыч шотышто шке шонымашыштым ойленыт, законодательный органлаште пайдаланыме паша формышт дене палдареныт, ончыкыжымат пырля ышташ ямде улмыштым пеҥгыдемденыт.
Михаил Зиновьевич коллегыже-влаклан вашлийын мутланаш йӧным мумыштлан тауштен да марий депутат-шамычлан шотыш налаш кӱлмӧ икмыняр оҥай практикым палемден.
Ушештарена: кок калыкле республикын парламентышт 2006 ий 31 май гычак пашам ваш келшен ыштат.
7 ноябрьыште Михаил Васютин «Россий Федераций Финн-угор калык-влакын ассоциацийышт» Общероссийский мер толкынын председательже, сенатор Пётр Тултаевын ӱжмыж почеш Лидерстве калыкле школын Ижевскыште эртыше мероприятийлашкыже ушнен.
Форумышто Российын 30 утла регионжо гыч финн-угор да самодий калык-влакын еҥышт лийыныт. Мемнан республик гыч одо рӱдолашке Максим Алгайкин ден Анастасия Муравьева миеныт.
– Тачысе илышыште, шке калыкын йӱлажым тунеммылан да вияҥдымылан тӱткышым ойырен, чын корным ойырен налмыланда, тӱвыра кылым саемдымыланда тауштем. Элыштына калык-влак коклаште келшымашым пеҥгыдемдыме верч тыршыше кажне айдеме патриот манын шонем, – форумын торжественный ужашыштыже палемден Михаил Васютин.
Спикерын ойлымыж почеш, шке калыкын тӱвыраж ден йылмыжым вияҥдыме аланыште тыршыше-влакын чотыштым кугемдымашке Марий Элат шке надыржым пышташ тырша. Пример шотеш республикыштына Самырык-влакын слётыштым 10 ий утла эртарымым кондаш лиеш.
Законодательный органым вуйлатыше эше ик йӱла нерген каласкален, тиде калыкле тӱвыран «Икоянлык – келшымаште» молодёжный фестивальже. 7 ноябрьыште тудо Йошкар-Олаште латикымше гана эртен. Тушто марий вузлашке тӱрлӧ калык да эл гыч тунемаш толшо-влак участвоватлат.
Форумын кышкарыштыже «Российын молодёжьшо – жап дене тӧр» эксперт сессий эртен. Тушто Удмуртий гыч специалист-влак кызытсе технологий да йӧн-шамычын полшымышт дене этнокультурный проект-влакым илышыш пуртымо, шочмо йылме ден йӱлам вияҥдыме опытышт дене палдареныт. Тылеч вара «Медиапроект – калыкле тӱвырам вияҥдыме йӧн», «Калыкле тематикыште – еш бизнес», «Калыкле тӱвырам у, эскперимент формылаште: этнодизайныште, артыште, семыште, вургемыште – угыч кучылташ тӱҥалмаш» тематический площадке-шамыч пашам ыштеныт.
Форумын участникше-влак «Мемнан СВО геройна-влак» Всероссийский усталык фото паша конкурсым иктешлыме почеш чумырымо ончерын экспозицийжым онченыт.
Тиде кечынак Россий Федерацийын шукерте огыл чумырымо Финн-угор да самодий калык-влакын молодёжный советыштын икымше заседанийже эртен. Тудо АФУН-ын ужашыжлан шотлалтеш да элнан регионлаштыже самырык активист-шамычын пашаштым виктараш тӱҥалеш.
Пленар заседанийыште АФУН-ын Молодёжный советшын председательжылан Максим Алгайкиным сайленыт.
Маргарита ИВАНОВА
Удмурт Республикысе Кугыжаныш Советын фотожо
