2028 ийыште «Туризм да унам вашлийме индустрий» национальный проект дене келшышын, Марий Элыште чыла шотыштат кызытсе жаплан келшыше «Вӱдленд» турист кластерым пашаш колтат.
Проект почеш пӱртӱс лоҥгаште, лачшымак вӱд вокене, еш дене але посна канаш тӱрлӧ йӧн йышталтеш. «Вӱдленд» – тиде ола воктенысе ныл кумдыкышто вераҥдыме каныме базе-влак. Кажныжын – шкенжын философийже, палемдат проект оза-влак. Тӱрысшӧ – тиде 13809 квадратный метр кумдык, илаш келыштарыме 190 номер. Тушко иканаште 576 еҥ миен кертеш. Ончылгоч шотлен лукмо почеш, идалыкыште 148190 еҥлан канаш йӧн лиеш.
Проектын ныл объектшат экологий шотышто яндар кумдыкышто вераҥын. Оралтымат, кӧргыжымат – чыла – кызытсе жаплан келшыше сай материал дене ыштыме да интеръер дене пойдарыме.
Нине ныл объект дене лишкырак палыме лийына. Икымшыже – Ер воктенысе «Вӱдленд» йоча-спортивно тазаҥдыме рӱдер. Тудо Шап ер воктене лиеш. Кажне сменыште тӱрлӧ кидпаша мастерской, хобби-рӱдер, шинчымашым, кумылым нӧлтышӧ клуб-влак пашам ышташ тӱҥалыт. Кажне кечын тӱрло модыш, конкурс, интерактив, моло программе-влак эртаралтыт.
Тазалыкым пеҥгыдемдыме «Вӱдленд» вес рӱдер Сурок деч тораште огыл, Щучъе ер воктене почылтшаш. Тушто канаш гына огыл, тазалыкым пеҥгыдемдаш традиционный процедур-влакым пуртыман комплексный программым ямдылат.
Куяр лесничествыш пурышо Студёнко эҥер пелен «Вӱдленд» парк- отельым почшаш улыт. Эҥерже телымат ок кылме, сандене кеҥежым веле огыл, йӱштӧ пагытыштат вӱд деке корно лиеш. Тушто икмыняр турист маршрутым ямдылат. Канаш шогалаш икмыняр объектым йӧнештарат. Тыгак колым кучаш йӧн лийже манын, колжым лӱмын ашнаш тӱҥалыт. Турист-влаклан пӱртӱс лоҥгаште кочмыверат лиеш.
Нылымше «Вӱдленд» парк-отель (Сокольный) Юл эҥерын заливше пелен, Звенигово районысо Кокшайск лесничествын Какшамарий участкыштыже вераҥеш. Тушто тӱҥ шотышто отельыш толшо-влак вӱдыштӧ, пеленже тӱрлӧ семын канен кертыт, тыгак сапборд, вейкборд, пуш дене кошташ, кечыште капым кӱкташ йӧн лийыт. Телым ече дене кошташ, снегоход дене кудалышташ, пикш дене лӱйкалаш, тыглай яндар южышто кошташ лиеш.
Ныл вережат турист-влаклан илаш чыла шотыштат йӧнан номеран оралте-влакым нӧлтат, кумдыкыштым тӱзатат да сайын канаш келыштарат. А оралте-влакым нӧлташ негызлан «Барнхаус» да «А-фрейм» стиль-влакым ойырен налыныт. Тыгай пӧрт-влак экологичный улыт, интерьерышт ойыртемалтше да окнашт йырым-йыр мо улмым ужаш йӧным почшо, кугу лийыт.
Пошкудо регионла гыч толшо турист-шамычланат туш логалаш куштылго лиеш: нине обект-влак кугорно деч тораште огыл вераҥыт.
Светлана Носова
Снимкылаште: теве тыгай оралте-влакым каныме базылаште нӧлтат.
Фотом проектын воткыл лаштыкше гыч налме.
