1 мартыште Марий Элыште 76-шо юж-десант дивизийын 104-ше гвардейский парашют-десант полкшын 6-шо парашют-десант ротыжын подвигшылан 25 ий теммылан пӧлеклалтше мероприятий эртен. Тушко Марий Эл вуйлатыше Юрий Зайцев, военнослужащий-влак, кучем еҥ-шамыч, лӱмлӧ спортсмен ден ӱмыр лугыч лийше герой-влакын родо-тукымышт, оласе калык илышыштым чаманыде Аргунский ущельеште террорист тӱшкам чарен шогалтыше герой-влакым шарнаш погыненыт.
«Таче ойыртемалтше кече. Ме шке илышыштым чаманыде историйын ик эн неле пагытыштыже элнам арален кодышо уэмше Россий геройжо-влакым шарнена. 25 ий ончыч гвардий подполковник Марк Николаевич Евтюхинын вуйлатыме 90 боецше путырак виян тӱнямбал террорист-влак ваштареш шогалын. Нуно тушманым чарен шогалтеныт веле огыл, 400 утла боевикым пытареныт. Сусыргышо Марк Николаевич ончыланышт шындыме задачым шукташ да йолташыже-влакым арален кодаш манын артиллерийлан тулым шке ӱмбакыже почаш кӱштен. Тудын подвигше курымешлан мемнан ушышто шарнымашеш кодеш», – палемден Юрий Зайцев.
2000 ий 12 мартыште Россий Федерацийын Президентшын Указше дене гвардий подполковник Марк Николаевич Евтюхинлан колымекыже Российын Геройжо лӱмым пуэныт.
Марий Эл Кугыжаныш Погын Председатель Михаил Васютин палемден:
«Таче ме чырык курым ончыч ыштыме подвигышт дене курымешлан мемнан Ачамландын историйышкыже возалт кодшо-влакым шарналташ погыненна. Нине рвезе-влак тыныс калык ден йолташышт-шамычын илышыштым арален кодышаш верч шкеныштым чаманен огытыл. Таче кечынат мемнан воина-влак 25 ий ончыч гаяк кидышкышт саргуралым налын Шочмо элнам аралат. Ме нунын подвигыштым шарнышаш улына».
Мероприятий жапыште Мрак Евтюхинын чапкӱжӧ воктеке пеледыш аршашым пыштеныт, герой-влаклан чаманымашым да таумутым ойленыт, тыгак тыныс да элнан лӱдыкшыдымылыкше верч вуйыштым пыштыше-влакым шарныме лӱмеш ик минут шып шогеныт.
Марий Эл вуйлатышын пресс-службыжын уверже негызеш Евгений Садовин ямдылен.
Д.Речкинын фотожо/ «Марий Эл вуйлатышын пресс-службыжо
