Нигӧ мӧҥгӧ каяш вашкен огыл
4 ноябрьыште Ленин лӱмеш тӱвыра полатыште Российысе В.Д.Поленов лӱмеш калык усталык пӧртын эртарыме «Сеҥымаш тулсавыш» фестиваль проект кышкарыште Марий Эл Республикыште гӱжлышӧ «Марий Эл – виян вер» фестиваль иктешлалтын. Патриотизм шӱлышан, тӱвыра да просветительский проектыш латшым муниципалитет ушнен, усталык коллектив-влак калыклан шке программыштым ончаш темленыт. Кодшо шуматкечын лауреат-влакын гала-концертышт лийын. Гала-концертым Марий Элын тӱвыра, печать да калык-влак паша шотышто министрже Константин Иванов почын.
– Фестиваль мемнам чыланнам иктеш поген. Тыге ме ваш-ваш ужын мутланен, ваш-ваш каҥашен, лекше экшыкым тӧрлен, умбакыже вияҥаш вийым муына. Таче ме кугу концертыш толынна, ятыр еҥлан шинчаш верат ситен огыл гынат, вет тидыже мом шога! Калык толын! Тугеже мемнан пашанам кӱкшын акла. Тачысе гала-концертын участникше-шамыч эн уста да мастар улыт. Сандене ме нунылан «Браво!» манын ойлена, – каласен министр да залыште улшо калыкым кугу пайрем дене саламлен.
Мыланем кажне районын концертшым ончаш логалын. Теве тыште эн чот ойыртемалтшыжым, эн-энжым манмыла, ончыктем. Ятыр чапле кадр пуренат огыл. Концертым Курыкмарий гыч «Шыжарвлӓ» образцовый ансамбльын (вуйлатыше – Ф.Эшмякова) да Микрӓк тӱвыра пӧртын калык ансамбльжын (вуйлатыше – А.Никеева) кӱслезышт-влак почыныт. Теве Морко районын «Морко кундем» калык вокал ансамбльже (вуйлатыше – Ю.Осипов) «Сарыш ужатымаш» сценкым ончыктен. Йошкар-Ола историй тоштер пеленысе «Чарла ола» фольклор коллектив Юрино районысо тошто рекрут руш мурым акапельно мурен. Медведево районысо Знаменский гыч Надежда Крылован, Килемар район Вӹзӹмйӓр гыч Лилия Кедрован, Волжск ола гыч Алексей Андреевын, Параньга район гыч Руслан Кадыровын да молынат мурымышт ятыр еҥын шӱмешыже логалын. Шернур гыч «Баян Х» дуэтын «Смуглянка» муро семышт, Оршанке район гыч «Сретение» пӧръеҥ да «Ошла сем» вокал ансамбль-влакын мурышт калыкын кумылжым савыреныт. Советский районысо латик гармонистын, лектын шогалын, «Латкок басан гармонет» семым шокталтымыж годым кушталтымет вел шуэш!
Палемдынем, гала-концертыш самырык-влакымат ушымо. Теве У Торъял ЦКиД пеленысе «Совла кырыше-влак ансамбльын» (вуйлатыше – Л.Смирнова), Звенигово районысо «Арт-Гранд» образцовый хореографий студийын (вуйлатыше – А.Демина), Медведево РЦКиД-н «Созвездие» образцовый вокал да «Позитив» куштышо образцовый студийже-влакын (вуйлатыше-шамыч – С.Епанечникова ден Т.Алексеева) выступленийыштым калык шокшын вашлийын. Параньга район гыч изи рвезе Айзат Норкинын почеламутым лудмыжо порылык дене шыҥдаралтын. Теве кушто самырык вий!
«Марий Эл – виян вер» фестиваль 1941–1945 ийласе Кугу Отечественный сарыште сеҥымашын 80-шо идалыкшылан пӧлеклалтын. Россий президент В.В.Путин ты кечым пайремлыме шумлык указым луктын. Тыныс верч кредалше-влакын подвигышт курымешлан кодеш. Ме вуйым савена шинчавӱдым йоктарен курым-курымла гоч салтак ӱдыр-эргыштым вучышо ава-шамычлан. Тылын труженикше, сӧйышто вуйыштым пыштыше-влаклан чап лийже!
Концерт деч варажат ончаш толшо-влак мӧҥгышт каяш ышт вашке. Пошкырт сем почеш кандырам пунен куштышт, Кельмаксола вел сем почеш тавалтышт.
М.СКОБЕЛЕВ
Авторын фотожо
