Лӱдыкшыдымӧ сай качестван корно
Немда гоч кӱвар пужен ышталтеш
«Лӱдыкшыдымӧ сай качестван корно» нацпроект дене келшышын Йошкар-Ола – Уржум автотрассын 70-шо километрыштыже пеш кугу пашалан – Немда эҥер гоч кӱварым пужен ышташ – пижме.
Шукерте огыл объектыште «Марийскавтодор» ГКУ-н базыж негызеш практикым эртыше студент-влак лийыныт. «Марий Эл Дорстрой» АО-н Медведево филиалжын тӱҥ инженерже нуным технологий пашан тӱҥ йыжыҥлаже да шуктышаш сомылын план-графикше дене палдарен. Тидым тунеммашын шкешотан йыжыҥже семынат ончаш лиеш. Практике ончыкылык специалист-влаклан регионым вияҥдымаште сай корнын полшымыж нерген умылашышт полша.
Кызыт тушто чоҥымо пашам тӱҥалаш, техникым шогалташ площадкым ямдылат, кӱвар гыч авыртышлам кораҥдат, связь линийым рончат, мланде йымалсе коммуникацийым вашталтат. Вет кӱварым пужен ыштыман.
У кӱварын кужытшо 59,2 метр, а тудын деке лишемме корнын кужытшо 2,183 километр лийыт. Пашан акше – 490 миллион теҥге. Объект 2025 ий ноябрьыште пашаш колталтеш.
Кӱварым пужен ыштыме жаплан ты корно дене кудалыштмым йӧршынлан чарыме.
Юрий ИСАКОВ ямдылен
Фотом «Марийскавтодор» ГКУ деч налме
