Теҥгече Марий Элыште социальный службо-влакын пашаеҥыштым саламленыт.
Социальный пашаеҥын кечыжлан пӧлеклалтше торжественный мероприятий Яков Эшпай лӱмеш Марий кугыжаныш филармонийыште эртен.
Марий Элым вуйлатыше Юрий Зайцев залыште шинчыше-влакым пайрем дене саламлен да профессионализмлан, калык деке тӱткӧ да поро кумылан улмылан тауштен.
Калыклан социально полшымо паша республик кучемын ик эн ончылно шогышо йодышыжлан шотлалтеш, палемден регионым вуйлатыше.
«Социальный службо тӱнен илыше-влаклан жапым шуйкалыде полшен кертше манын, ӱмаште отрасльысе тӧнеж-шамычын автопаркыштым уэмден кертмылан моткоч куаненам. Тӧнеж-шамычын материально-технический базыштым уэмдыме шотышто чапле результатыш шумымат палемдыде ом керт. Калыклан шӱм-чонлан келшыше да сай йӧн-влакым ышташ тыршымыда дене тӱрыснек келшем. Тений «Пӱнчер ото» илалше еҥ ден инвалид-влаклан интернат-пӧртым уэмден олмыктымо пашам мучашке шуктымым шкеак эскерем. Отрасльын социальный ойпидыш да илалше еҥ ден инвалид-влакым кужу жап ончымо системым илышыш пуртымо пашажым сай велым аклем», – манын Ю.Зайцев.
Кызыт эше ик эн кӱлешан пашалан специальный военный операцийыште улшо сарзе-влакын ешыштлан полшымым шотлыман.
«Цель ден задаче чынжымак шуко, да нунын коклаште проста ден кӱлдымӧ-влак уке улыт. Но те илышыште вашлиялтше чыла нелылыкым сеҥыше команде улыда. Пашадам кӱкшын аклем. Чылаландат сеҥымашым да порым гына тыланем!» – саламлен Ю.Зайцев.
Мучашлан Марий Элым вуйлатыше сулен налме награде-влакым кучыктен.
Пашам шуко ий тыршен ыштымылан Марий Эл Республик правительствын Чап грамотшо дене Килемар районышто Калыклан социально полшымо мере-влакым ыштыме рӱдерын вуйлатышыже Елена Васенева, Оршанке районышто Калыкым социально обслуживатлыме комплексный рӱдерын директоржо Татьяна Горшкова, Шоя-Кузнецово интернат-пӧртын тӱҥ бухгалтержын алмаштышыже Елена Плотникова, Какшанмучаш интернат-пӧртын труд дене инструкторжо Игорь Соломин палемдалтыныт. Марий Эл Республикым вуйлатышын Таумутшым Красный Стекловар интернат-пӧртын ончаш полшышыжо Равия Баязитовалан, Волжский районышто Калыклан социальный полыш мере-влакым ыштыме рӱдерын тӱҥ специалистше Алевтина Никитиналан, Килемар районышто Калыкым социально обслуживатлыме комплексный рӱдерын граждан-влакым мӧҥгыштӧ социально обслуживатлыме отделенийжым вуйлатыше Елена Сидельниковалан, илалше ден инвалид-влаклан Колянур интернат-пӧртын кастеляншыже Лидия Филосовалан увертарыме.
Марий Элым вуйлатышын пресс-службыжын уверже негызеш М.ИВАНОВА ямдылен
