Юрий Зайцев: «Инвалид-влакын декадышт – тиде чылалан южо еҥлан поро кумыл, полыш да тӱткыш кӱлмӧ нерген ушештарымаш».
7 декабрьыште Эрик Сапаев лӱмеш Марий кугыжаныш академический опер да балет театрыште Инвалид-влакын декадыштлан пӧлеклалтше торжественный мероприятий эртен.
Начар тазалыкан еҥ-влаклан социально полшымо йодыш правительствын ик эн ончыч шуктышаш пашажлан шотлалтеш, палемден Марий Элым вуйлатыше. Республикыште социальный обслуживаний организаций-влакын материально-технический базышт саемеш, илалше еҥ ден инвалид-шамычым кужу жап ончымо системе илышыш пурталтеш. Тений тыгай полышлан 25 тӱжем утла еҥ эҥертен.
Тылеч посна, регионышто илыше-влак «Абилимпикс» инвалид ден начар тазалыкан еҥ-шамыч коклаште профессиональный мастарлык шотышто национальный чемпионатыште призан верлам налыт.
«Залыште, кӧргӧ рӱдым, илыш вийым да нимучашдыме чытышым иктыш погалтен, пӱрымашым вес йогыныш савырен моштышо-влак погыненыт. Илышлан куанымыланда, поро кумылан улмыланда, социальный, усталык да профессиональный проектлашке ушнымыланда тауштем», – манын Ю.Зайцев да Юрино районысо калыкым социально обслуживатлыме комплексный рӱдерын директоржо Галина Зайцева ден Советский районысо Кундыштӱр интернат-пӧртын директоржо Михаил Туевлан «За заслуги перед Марий Эл» орденын медальжым кучыктен, икмыняр еҥым Таумутшо дене палемден.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
