1 апрель – Воштылчык кече. Тиде кечын шукышт йолташ, родо, пошкудо, коллеге-влакым ондалаш тыршат, тӱрлӧ мыскарам ыштат.
Мыскара ӱмырым шуя, чоным эмлаш полша да илышымат веселаракым ышта.
Йолташ-влак, мыскара илышыште кӱлешан мо? 1 апрельыште Те иктаж-кӧм ондаленда але шке иктаж-гана ондалалтында?
Надежда ВАСКАНОВА, Т.Евсеев лӱмеш национальный тоштерын этнографий пӧлкажым вуйлатыше:
– Изи годым тиде кечын ме, йоча-влак, икте-весынам тӱрлӧ семын ондаленна, воштылтенна: «тупет ошемын», «шнурокет рончалтын», «сумкат почылтын»…
А кызыт 1 апрель тыглай кече семын эрта гынат, илышыште мыскарам ыштыде огеш лий.
Анжела ТИХОНОВА, республикысе Курчак театрын режиссёржо:
– Воштылчык кечым йоча жапыште поснак чот вучет, вет тунам чыла, даже туныктышо денат, мыскарам ышташ лиеш. Шарнем, чылалан палыме «тендан тупыштыда ошо» мыскара дене чыла туныктышым тергенна.
А кызыт ынде шкенан икшывына-влак тыге ойлат да мемнамат йоча пагытыш пӧртылтат. Садлан ты кече мылам сылне жапын тамжым «шижаш» йӧным пуа.
Валеа ЛАЙЕГПУР, «Ассалам» кавказ куштымаш ансамбльым вуйлатыше:
– Мыскара деч посна илаш йокрок. Тудым лудат ма але шке ваш тӱкнет – шыргыжалде от чыте. «Воштылат, ӱмырет кужемдет», – маныт калыкыште. Садлан кажне еҥын чоныштыжо мыскара шӱлыш лийшаш, но тудым моштен кучылтшаш.
Тиде кечын мыскаралан куанем, а шке ом ондале.
Татьяна ПОПОВА, Самырык-влаклан Олык Ипай лӱмеш премийын лауреатше:
– Мыскара илышыште чот кӱлешан, молан манаш гын таче илыш моткоч неле. Садлан кунам мыскарам ыштет але колыштат, кумыл нӧлталтеш, йӧсылык мондалеш. Мыскара ӱмырым шуя, садлан тудым ыштен моштышо воктенет уло гын, эшеат кугу пиаллан шотлыман.
Тиде кечын ончыч мыят йолташ-влакым ондаленам да шкеат ик гана веле огыл ондалалтынам.
Эвелина БЕЛОВА, Тошто Торъял тӱвыра пӧртын художественный вуйлатышыже (У Торъял район):
– Илышыште мыскара моткоч кӱлешан. Тудын деч посна ик кечат ок эрте.
Школышто тунемме годым ты кечын рвезе-шамыч икте-весым ондалаш чотак йӧратат ыле. Южо мыскараштым шарналтем да кызытат оҥайын чучеш.
1 апрельыште Тошто Торъял тӱвыра пӧртыштына «Ший оҥгыр» ансамбльын чолга участникше-влак мыскара шӱлышан концертым ончыктена. Тыге ме верысе калыкын кумылыштым нӧлташ тыршена.
Татьяна ПЧЁЛКИНА, поэт:
– Мыскарам ожнырак пеш умыленыт, нелеш налын огытыл. Кызыт тидым шагалын умылат, шонем. Кожганен, сыренат колтат. А вет весела кумыл дене ыштыме мыскаран ямжак весе: воштылат, куанет, оҥай. «Кугарня» газетын эртарыме «Воштылаш, товатат, сулык огыл» мыскара конкурсшо мыняр уста мыскарачым чумырен? А тений тудо огеш эртаралт. Тыге мый мыскаран кӱлешлыкшым йомдарымылан тургыжланем.
Тиде кечын мый нигӧм ондален омыл, а мыйым изиш ондалаш тӧченыт. Но тиде мыскара улмым чылан умыленна.
Алевтина Байкова ямдылен.
Фотом еш альбом гыч налме.
