Спецопераций
«Мыланна те чылан иктӧр улыда»
«Вагнер» подразделенийын боецше-шамыч ветеран статусым налыныт.
«Защитники Отечества» кугыжаныш фондын регионысо филиалже специальный военный операцийын участникше-влаклан боевой действийын ветеранже удостоверенийым налаш полшат. Тиде документ социальный полышым налаш йӧным ышта.
Эртыше кечылаште Йошкар-Олаште «Вагнер» подразделенийын боецше-шамычлан удостоверенийым торжественно кучыктеныт. Марий Эл правительстве председательын икымше алмаштышыже Евгений Курмаев порысыштым шуктымыштлан тауштен.
– Подвигланда, патырлыкланда тау. Республикна гыч спецоперацийыште участвоватлыше-влак чылан иктӧр улыт, – ойлен Евгений Евгеньевич.
Регионысо филиалын вуйлатышыже, Мужество орденын кавалерже Ренат Магсумов герой-шамычым ветеран статусым налме дене саламлен. Тудын палемдымыж почеш, тиде документ – элнам верч порысым шуктымо символ.
– Тендан кокла гыч кажныже, лӱддымылыкым, пеҥгыдылыкым ончыктен, порысдам шуктенда. Филиалын командыже тыланда ончыкшымат полшаш тӱҥалеш, – манын Ренат Зуфарович.
Документым налше кокла гыч иктыже – Гор Григорян. 2022 ий шыжым передовойыш шке кумылын каен. Служитлымыжлан «За Отвагу» медаль дене наградитлалтын.
– Кугу Отечественный сар жапыште кочам фашист ваштареш кредалын. 1943 ийыште чот сусыргымыжлан кӧра тудым комиссоватленыт. Ачамат СССР Вооруженный Вийыште служитлен. Нуно мыланем пример лийыныт. Лач тидак передовойыш каяш шӱкалтышым ыштен, – палемден тудо.
Удостоверенийым кучыктымо деч вара спецоперацийын участникше-влак социальный полыш нерген келгынрак пален налыныт да «Герои Отечества» тоштер-патриотике рӱдерыш миеныт.
«Защитники Отечества» кугыжаныш фондын регионысо филиалже уверже негызеш Елена Эшкинина ямдылен.
