Теве тыге маналтын XII Марий калык погынышто пашам ыштыше фотоончер. Тудын авторжо – Пошкырт кундем Мишкан районысо Метръялын шочшыжо, Россий фотосӱретче-влак ушемын еҥже (2010), Яныш Ялкайн лӱмеш премийын лауреатше (2012) Вадим Алексеевич Мадияров. Ик эн кугу сеҥымашыжлан 2017 ийыште Россий фотосӱретче-влак ушемын икымше председательже Андрей Иванович Баскаков лӱмеш премийын лауреатше лиймым шотлыман, очыни.
«Призваний почеш буровик улам, а чон дене – сӱретче», – манеш шкеже. Тыглай илышыште тудо Когалым оласе ик предприятийыште рӱдӧ технологический службын вӱдышӧ инженержылан – буровой раствор шотышто группым вуйлатышылан ышта.
Теве тыге шочмо кундемже деч тораште шуктен толмо паша кокла гыч тудо усталык шӱлышыжым ончыкташат жапым муэш. Мландекӧргысӧ поянлыкым лукмо пашаште тыршыше нефтяник йолташыже-влаклан пӧлеклыме фотоончержат чумыралтын да ты олаштак лийын. Сибирьысе пейзаж, буровой вышке-влак, нефтьым лукмо паша тушто ончыкталтыныт.
Паша дене Вадим Алексеевичлан чӱчкыдын командировкыш кошташыже логалеш. Но шке шочмо Мишкан кундемышкыжат толын каяш жапым муэш. «Тудо – ӱнарым налме мыйын вер», – манеш шкеже. Икымше персональный фотоончержымат тудо икмыняр ий ончыч лач Мишкан селаште эртарен, чыла пашам тыгак шке шочо кундемжылан, пӱртӱсыжлан, марий йӱлалан, лишыл еҥже, палымыже-влаклан пӧлеклен. Тыгайракак сынан ончерым Марий калык погынышкат конден.
Школ деч вара тудо фотограф лияш шонен. Ирсай школым пытарымеке, фотографлан тунемме-производственный комбинатыште шинчымашым нӧлтен. Но, пытарен шуктыде, рвезым армийыш налыныт. Касвел йотэлыште пограничниклан служитлаш логалын. Вадимын фотопашалан кумылан улмыжым пален налмеке, замполит лӱмын фотоаппаратым налын пуэн. Тыге тудо заставыште эртаралтше чыла мероприятийым войзаш тӱҥалын. Эсогыл дозорыш кайымыж годымат пеленже фотоаппаратым налын.
Службо деч вара угыч тунемме-производственный комбинатыш пӧртылын. А тудым пытарымеке, направлений почеш самырык еҥым Нефтекамскысе фотопаша фабрикыш фотографлан колтеныт. Но романтике шӱлышан рвезе ты оласе буровой паша управленийыш пашаш каен. Бирскыште ыштымеке, Когалым оласе буровой компанийыш куснен. Таче марте туштак ышта.
Но фотопаша садак чонжылан лишыл кодын. Эшежым паша дене шуко оҥай еҥ вашлиялтын, нунымат историеш войзен кодаш кӱлешак манын, угыч кидышкыже фотоаппаратым налын. Мом ойыртемалтшым ужын, чылажымат объективышкыже налын.
Вара шке пашаже-влакым Уфа ола гыч тале фотосӱретче Вячеслав Бойковлан ончыкташ тӱҥалын. Тудыжо кажне пашажлан акым пуэн. Иктыжым сайлан, весыжым начарраклан шотлен. Тыгак Вадим Алексеевичынат мастарлыкше кушкын. Илен-толын, туныктышыжын мокталтымыжымат вучен шуктен. Вара – икымше персональный ончер, весе… Икмыняр тат гыч тудо вес олаласе ончерлашкат пашажым колташ тӱҥалын: Нефтекамскыш, Бирскыш, Уфаш, Москваш, Казаньыш, Йошкар-Олаш, Ханты-Мансийскыш… Таче тудын пашаже-влак Когалымысе изобразительный сымыктыш тоштерын фондыштыжат, Уфа ден Нефтекамскысе частный коллекцийлаштат, тыгак Венгрий ден Швецийын национальный тоштерлаштыжат улыт.
Светлана Носова
Снимкыште: В.Мадияров
Авторын фотожо.
