Чолгалык

«Мыйын ӱшанле йолташем»

«Мыйын ӱшанле йолташем»
18 июльышто Москосо Сеҥымаш тоштерыште «Мыйын ӱшанле йолташем» ойлымашым возаш всероссийский конкурслан старт пуалтын.
Тыгай творческий таҥасымаш Фронтовой пий кечым палемдымылан пӧлеклалтеш. Конкурсыш элнан чыла регионжо гыч 7-17 ияш-влак ушнен кертыт.

– Чылан палат, пий – айдемын йолташыже. Историйым шергалаш гын, ныл йолан йолташнан ӱшанле, патыр, аралтыш улмыжым палена. Кугу Отечественный сарыште кудло утла фронтовой пий служитлен. Тушто пий-связист, санитар, сапёр, диверсант, почтальон, кычкыме пий-влак лийыныт. Сӧй пасу гыч чылаже 700 утла сусыргышо салтакым луктыныт, 4 миллион мине ден фугасым муыныт да палемдыме верыш 200 тӱжем докуменым конден шуктеныт, – палемденыт организатор-шамыч.
Конкурсыш ушнышо-влаклан йӧратыме пийышт нерген изирак ойлымашым возаш кӱлеш. Участник-шамыч ныл йолан йолташыштын героический поступкышт, оҥай але тунемаш лийше ситуаций нерген палдарен кертыт. Пашан кугытшо пробел дене пырля 3000 знак деч кугу лийшаш огыл. Ойлымашым фото дене сӧрастараш лиеш. Творческий пашам 14 август марте налыт. Оргкомитет сеҥышым тыгай номинацийлаште палемда: «Туныктышо ойлымаш», «Ныл йолан герой», «Весела историй», «Ты тӱняште кажнылан пӧрт кӱлеш» (пӧртдымӧ пий нерген), «Литератур стиль да художественный текстлан», «Эн самырык автор»,. Тыгак 15-17 августышто сайтыште онлайн-йӱклымаш лиеш. Тушто «Приз зрительских симпатийым» палемдат.
20 августышто Москосо Поклонный курыкышто, «Армийын тӱҥ саркурал реликвийышт» тоштерыште, сеҥышым, эн сай пашам палемдат. Конкурсышто учствоватлыше чыла еҥлан сертификтым пуат.
Конкурс нерген рашрак тыгай сайтыште пален налаш лиеш: https://victorymuseum.ru/online-programs/competition/konkurs-rasskazov-moy-vernyy-drug-2022/.
19 август – Фронтовой пийын кечыже. Ты датым 2017 ийыште Сеҥымаш музей палемден. Тудо Кугу Отечественный сар жапыште служебный пий-шамычын подвигыштлан пӧлеклалтын. Лач ты кечын 1943 ийыште Дина лӱман фронтовой овчарке тушманын кӱртньыгорныжым пудештарен, но шкеже колен огыл. Ончычат нылйолан полышкалышына-влак пудештарылыныт, но тыгодым шкештат ӱмыр лугыч лийыныт. А Дина немыч паровоз ончыко, рельсыш, кудал лектынат вачыштыже келыштаралтше миным шуэн, пӱйжӧ дене предохранительный чекым шупшылын да верже гыч тӧршталтен кораҥын. Ты кечын фронтовой сводкышто теве мом увертареныт: «1943 ий 19 августышто Полоцк Дрисса перегонышто тушманын эшелонжым пудештарыме. Лу вагоным пытарыме, кӱртньыгорнын кугу кутышыжо йӧрдымыш лектын. Мемнан велым йомдарымаш уке».
Е.Эшкинина.

Опубликовать в Одноклассники

Добавить комментарий