3 августышто Кужэҥер район Визымйыр ялыште моло ийласе семынак «Марий Швейцарий» каныме базыште регион-влак кокласе калык усталык «Муро памаш» фестиваль эртен.
Фестивальыш икымше гана 2015 ийыште чумыргеныт. Тӱҥалтыште тудо район, вара республик кӱкшытыштӧ эртаралтын, а кызыт кумшо ий тушко регион-влакат ушнат.
Тений тиде мероприятийыш 8 солист, 30 коллектив лийыныт, тыгак Марий Эл, Татарстан республикла, Йошкар-Ола ден Москва гыч 27 кидмастар шке пашаштым ончыкташ да ужалаш конденыт.
Кок ий ончыч мыят тиде фестивальым ончаш миенам ыле. Тунамак тушто каныме базым ончен савырнаш, кидмастар-влакын эртарыме мастарлык класслаштышт тидым я тудым шке ышташ, каналтыме семын «Чайныйыш» пурен, иктаж тамле сий дене чайым подыл лекташ, национальный костюм-влакым чиен, фотозонышто войзалташ, тӱрлӧ калык модыш дене модаш йӧн пуалтме келшен ыле.
А тений фестивальын программыжым эшеат пойдареныт, коеш, вет ты гана кумылан-шамыч марий калык куштымаш ден тошто семӱзгар-влакым шокташ тунемме мастер-класслашке ушнен, фольклор площадкыште мурен, куштен кертыныт. Адакшым кок ий ончычсо дене таҥастарымаште, кидмастар-шамычат ятырлан шукынрак лийыныт. Тыге гын, фестиваль нерген шарнымаш эшеат кужу жаплан кодшо манын, утларак сӧрастарышым, молым шке ыштен, мӧҥгышкӧ кондаш йӧн лийын. Теве тунам мыят ик кидмастар дене браслетым пырля ыштенна ыле, но, эх, жалке, Кӱ Курыкым ончалаш миен толмо годым ала-могай татыште кидем гыч мучышталт возын кодын. Уке гын тачат куанен чиен коштам ыле, товатат…
Тений вес ойыртемат лийын: мероприятий конкурс огыл, а фестиваль семын гына эртаралтын. Тиде амал дене эн ойыртемалтше-влакым палемден огытыл. Тыге гын, кажныже сеҥыше! Санденак чылаштлан дипломым да фестивальын символикыжым кучыктеныт. А участник-шамыч тидым кузе акленыт? Фестиваль могай шарнымашым коден? Тидын нерген Кужэҥер район Кугу Лаждӱр тӱвыра пӧртын фольклор шотышто специалистше, верысе «Марий сем» калык ансамбльын участницыже Римма Глушкова тыге ойлыш:
– Тӱрлӧ номинацийыште икымше, кокымшо да кумшо верлашке лекше-влакым ойырен налын огытыл гынат, тиде кумылнам нимынярат волтен огыл.
Тений участник-шамыч шукын лийыныт, сандене шкенан район гыч тушко ушнышо-влак ик номер гыч веле ончыктенна, а молышт – кокыт гыч.
Фестивальыште чылажат келшен. Ме, мутлан, тыгак Тошто Йӱледӱр гыч коллектив подкогыльым ыштенна да чылаштым сийленна. Тиде амал дене мероприятийым тӱрысшӧ ужынат шуктен огынал гынат, программе пеш поян лиймым шижынна. Фестиваль ондакысе деч эшеат сайын эртымыла чучо.
Фестиваль этнодискотеке дене мучашлалтын.
Любовь Камалетдинова
Фотом интернет гыч налме
