Лаштыкнан тачысе унаже – Марий Турек посёлко гыч Юлия Усова.
Юлия Йошкар-Оласе медицине колледжын икымше курсыштыжо тунемеш, спортым йӧрата, изинекак мураш кумылан. Марий Эл радион эфирыштыже тудын икмыняр мурыжо йоҥга.
Эстраде аланыш ушнаш тудым мо таратен? Репертуарже кугу мо? Нине да моло нерген шкеж дене мутланышна.
– Юлия, райрӱдыштӧ иленат гынат, марла яндарын мутланет. Тиде мо дене кылдалтын?
– Нылымше класс марте ме Советский районышто иленна, ешыште ача-авам эреак марла мутланеныт, школыштат марий йылме ден литературым тыршен тунемынам. Варажымат, Марий Турекыш илаш куснымеке, нине уроклаште Светлана Алексеевна Алексеева шочмо йылмым йӧраташ да эшеат сайын палаш кумылаҥден: олипиадыш ушнаш, тӱрлӧ конкурсышто, сылнымут лудмаште мастарлыкем терген ончаш темлен. Икана туныктышем нерген возымо сочинений дене республик кӱкшытан конкурсышто кокымшо верым налынам. Диктантым марла возымаштат ойыртемалтынам.
– Йылмылан да сылнымутлан шӱмаҥше улат, а трукышто медициным ойырен налаш мо таратен?
– Йылмым палем, тудо эреак пеленем лиеш, а медицине пашаеҥ лияшак шоненам. Садлан кандашымше класс деч вара Ургаш лицейыш, а ӱмаште Йошкар-Оласе колледжыш тунемаш пуренам. Шарнем, ковам черланымеке, тудым эмлаш, тӱрлӧ таблеткым жапыште пуаш келша ыле.
– Юлия, мураш кунамрак шӱмаҥынат?
– Йочасадыш коштмем годым Кужмарий тӱвыра пӧрт пеленысе «Эр ӱжара» ансамбльыш мураш коштынам. Художественный вуйлатыше Валентина Николаевна Ефремова дене пырля ятыр такмакым тунемынна, муренна. А визымше классыште тунеммем годым шкетын мураш тӱҥалаш шонымо нерген авамлан ойленам. Тудат оем дене келшен да интернетыште почеламутым возгалыше-влакым кычалаш тӱҥалынна. Христина Александрован мурылан шомакым возымыжо, ятыр мурызо дене кылым кучымыжо нерген пален нална да меат тудын деке йыҥгыртышна. Тунамак икымше муро мо нерген лийшашым пырля мутланышна.
– Тугеже икымше мурет мо нерген? Семым возаш кӧлан ӱшаненат?
– Мотор пӱртӱслан да сылне вершӧрлан поян Марий Эл нерген, садлан мурымат «Шочмо вер» манын лӱмденна. Семым возаш Христинан темлымыж почеш Виктор Апталиковлан ӱшаненам.
– Тудым икымше гана кушто муренат?
– «Ямде лий» газет дене кылым кученам, кертмем семын тушко возкаленам. Кудымшо классыште юнкор слётыш ӱжыныт ыле да туштак икымше гана муремым йоҥгалтаренам. Изиш тургыжланенам, но йолташ-влакын шокшо кидсовышышт кумылем нӧлтен.
– Туддеч вара репертуаретым эшеат пойдараш тӱҥалынат докан?
– Туге. Кызыт репертуарыштем чылаже вич мурем уло: «Шочмо вер», «Иле куанен», «Тау, туныктышем», «Шочмо кечыда дене», «Лийза пиалан». Чыла муремын мутшым Христина возен, а сем дене тӱрлын сӧрастареныт: Станислав Устюгов, Дмитрий Погадаев.
– Почеламутым возаш шкендын кумылет лийын огыл?
– Ныл-кандаш корнаным возкалем, но мурылан келшен огыт тол докан. Христинан возымыжо келша, калыклан ойлаш шонымем шке корнылаштыже раш почын пуа.
– Ямде мурым икымше гана кӧлан колыштыктет? Кӧн ой-каҥашыже тылат шерге?
– Авам, Алевтина Александровна Усова, кеч-могай пашалан кумылаҥда, полша. Мурым колыштмеке, акым пуымыжо мылам эн шерге. Пеш кугу тау тудлан, таза лийже!
– Кызыт концертыш але иктаж вес вере мураш ӱжыт?
– Кугу тӱткышым тунеммашлан ойырем, кызыт сессий кая. Марий Турек посёлкышто иктаж мероприятий эртыме годым мероприятийым сӧрастараш ӱжыт. Тыгак Шкетан лӱмеш Марий национальный драме театрын фойештыже эртыше пайремыште, а шукерте огыл «Кугарня» редакцийын эртарыме «Какшан сер ӱмбалне» фестивальыште (кокымшо вер дене палемдалтын – авт.), Пеледыш пайремыште муренам. Кажне гана калык ончыко лекме пеҥгыдемда, молан-гынат туныкта.
– Марий Эл радиошто муретым колмеке, чонетым могай шижмаш авалта?
– Мутат уке, куан кумыл… Но йолташ, родо-тукым ончылно изиш аптыранымемла чучеш. Садлан тунемме верыштат мурымем нерген шагалын палат.
– Изиэт годым кӧ лияш шоненат?
– Авам – туныктышо, садлан йочасадыш коштмо годым мыят тудын гаяк лияш шоненам. Курчак-шамычым ваштарешем шынденам да азбукым, букварьым, ньога-шамычлан келшыше тӱрлӧ книгам лудынам.
– Яра жапым кузе эртарет?
– Тунемме деч вара колледжысе спортзалыш, баскетбол дене тренировкыш, вашкем. Командына дене вес регионлашкат ик гана веле огыл лектынна.
Алевтина БАЙКОВА мутланен.
Фотом еш альбомжо гыч налме.
