Марий Эл правительстве председательын икымше алмаштышыже Наталья Ошланова, регионын тазалык аралтыш министрже Владимир Гладнев да тудын алмаштышыже Ангелина Ушакова Медведево районысо рӱдӧ больницыш миен коштыныт.
Уна-влак реанимацийым, операцийым ыштыме блокым, стационарын терапевтический ден хирургический отделенийже-шамычым, приёмный покойым да поликлиникым ончен савырненыт. Пытартышыштыже пациент-влакым приниматлыме радамым тергеныт, начарын коштшо граждан-шамычым обслуживатлаш лийме нерген мутланеныт.
Вуйлатыше-шамыч у поликлиникым чоҥаш да сутка мучко пашам ыштыше стационарым олмыкташ кӱлмӧ йодышым онченыт. Тыгак Медведево районысо рӱдӧ больницын структур подразделенийжылан шотлалтше Оршанке районысо больницыште шокшо вӱдым ямдылыше котельныйым чоҥымо йодышым нӧлталыныт.
Маргарита Иванова.
Марий Эл Тазалык аралтыш министерствын фотожо.
