КУЛЬТУР ДА ИСКУССТВО СЫМЫКТЫШ

Морко ӱдыр-рвезе-влак– икымше

«Тӱвыра» нацпроект почеш у тӱсым налше Морко йоча сымыктыш школышто тунемше-влак сеҥымашышт дене куандаренак шогат.

Шукерте огыл ты тунемме вер пеленысе «Созвучие» ансамбль (вуйлатышыже – Алексей Степанов, концертмейстерже – Ольга Михайлова) Татарстанысе Зеленодольск олаште эртаралтше «Головокружительные пальцы-2023» фестиваль-конкурсышто икымше степенян лауреат лӱмым сеҥен налын.

Мероприятийыште Йошкар-Ола, Зеленодольск, Казань, Набережные Челны, Арск, Верхний Услон, Сургут олала гыч калык семӱзгарым шоктышо ансамбль ден оркестр-влак мастарлыкым ончыктеныт.

Изи артист-влакын произведенийым мастарын шоктымышт, марий вургемышт чылалан пеш келшен, – палемден Йоча сымыктыш школым вуйлатыше Алексей Степанов. – Организатор-влаклан сай мероприятийым эртарымыштлан кугу таум ойлем. Мемнан школышто тунемше-влак сымыктыш аланыште ешартыш шинчымашым веле огыл налыт, тӱрло конкурсыштат мастарлыкым тергат да сеҥышыш лектыт.

Ушештарена, Морко йоча сымыктыш школым «Тӱвыра» нацпроектын «Тӱвыра алан» регионысо проектше почеш 2021 ийыште олмыктымо. Тидлан 8 миллион утла теҥге ойыралтын.

А.БАЙКОВА

Фотом Морко администрацийын соцкыл лаштыкше гыч налме

Опубликовать в Одноклассники

Добавить комментарий