Йошкар-Оласе рӱдӧ тӱвыра да каныме парк «Хрустальное колесо» XXIII тӱнямбал конкурсышто сеҥен.
«Идалыкын эн сай патриотический мероприятийже» номинацийыште «Спектакль-квест «Взгляни вокруг! История перед тобой» проектше палемдалтын. Тудым парк пашаеҥ-влак тений 5-8 майыште, Кугу Сеҥымаш кече вашеш, Тӱвыра инициативе президент грант полшымо дене илышыш шыҥдареныт.
Паркын воткыл лаштыкыштыже сералтын:« Конкурс организатор-влаклан мемнан мероприятийым кӱкшын аклымылан, Тӱвыра инициативе президент фондлан проектым илышыш шыҥдараш полшымылан, шкенан пашаеҥ-влаклан кугу пашам шуктымылан да паркыш толшо-влаклан полшымыштлан кугу таум ыштена».
Снимкыште: парк директор Иван Конышев конкурс иктешлалтме годым.
Фотом паркын воткыл лаштыкше гыч налме.
