16 январьыште Марий Элым вуйлатыше Юрий Зайцев Медведево районысо Силикатный посёлкышто паша дене лиймыж годым врачебный амбулаторийым ончен савырнен. Объектым 2023 ий мучаште «Здравоохранений» национальный проектын «Марий Эл Республикыште здравоохраненийын первичный звеножым модернизироватлымаш» регионысо проектшым илышыш пуртымо кышкарыште чоҥымо.
У медицине тӧнежыште приёмым терапевт, педиатр да гинеколог эртараш тӱҥалыт, тыгак процедур да прививке кабинетла ден регистратурым оборудоватлыме.
Силикатный врачебный амбулаторийым чоҥымо дене калыклан икымше медико-санитарный полышым пуаш келшыше сай йӧным ыштыме. Тыште тыгак профосмотр ден диспансеризацийым эртараш, йоча ден мӱшкыран ӱдырамаш-шамычын тазалыкыштым эскераш тӱҥалыт.
«Амбулаторий 1744 еҥым обслуживатла. Тылеч ончычсо тӧнежым эртыше курымын 50-ше ийлаштыже чоҥымо улмаш, да тудо йӧрдымыш савырнен. У объект моткоч йӧнан, тӱҥжӧ – тышке райрӱдӧ гыч врач-влак толын да калыклан утларак келге да кӱлешан медицине полышым пуэн кертыт. Мом ужмем келшен. Тышке оборудованийым гына 3 миллион теҥгелан налме. Икманаш, калыклан мо кӱлеш гын, чыла уло», – палемден Ю.Зайцев.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
