23 декабрьыште республикысе Марий тӱвыра рӱдер М.Шкетан лӱмеш Марий национальный драме театрыште йоча-влаклан пӧлеклалтше У ий пайремым эртарен. Тушко республик мучко марий йылмым тунемше, усталык, уш-акыл, спорт конкурслаште сай лектышыш шушо ӱдыр-рвезе-влак чумыргеныт.
Пайрем «Кум ака-шӱжар» спектакль дене почылтын. Вара изи уна-влак ончыко Пире, Рывыж, Пий, Йӱштӧ Кугыза ден Лумӱдыр лектыныт. Нуно погынышо-влакым мурыктеныт, марий сем почеш куштыктеныт, тӱрлӧ модыш дене модыктеныт.
Рывыж, Мераҥ, Пырыс, Йошкар Упш, Марий патыр ден Пампалче … Ӱдыр-рвезе-влак могай гына костюмым чиен толын огытыл ыле. А эн моторжо-влак Марий тӱвыра рӱдерын эртарыме «У ий чием» конкурсышко ушненыт. Тушто 6-9 ияш коклаште икымше вер Анастасия Рябининан (Советский район Ӧрша тӱҥ школ), 10-12 ияш коклаште – Валерия Шутолеван (Кужэҥер район Коҥганур кыдалаш школ) лийын, 13-15 ияш коклаште – Валерия Кузьминан (Волжск оласе лицей).
«У ий дене» видео саламлымаш конкурсышкат шуко сай паша пурен. 6-9 ияш коклаште Иван Кудрявцев (Советский район Кужмара тӱҥ школ), 10-12 ияш коклаште Венера Кириллова ден Ярослав Гаврилов (Морко район Шӱргыял тӱҥ школ), 13-15 ияш коклаште Богдан Конаков (Шернур районысо Казанский кыдалаш школ) ойыртемалтыныт.
«Йӱштӧ Кугызалан серыш» конкурсышто 6-9 ияш-влак коклаште икымше верыш Софья Яковлева (Советский район Роҥго кыдалаш школ) лектын. 10-12 ияш коклаште ончылно Матвей Садовин (Оршанке район Кугунур кыдалаш школ). 13-15 ияш коклаште Илья Максимовын (Волжский район Пӧтъял кыдалаш школ) пашажым кӱкшын акленыт.
Тыгак ты кечын уш-акыл пӱсылыкым тергыше «Мунло» модмаш ден Ава кечылан пӧлеклалтше конкурсым иктешленыт. Сеҥыше-влак диплом да пӧлек дене палемдалтыныт.
Вашлиймаш мучаште кажне йочалан шере пӧлекым кучыктеныт.
О.МОШКИНА
М.Скобелевын фотожо
