Ӱярня – пӱртӱс ылыжме, телым ужатыме да шошым вашлийме пагыт. Марий калык кугезе пайрем йӱлам кызытат арала. Тиде кечышот пайремын эн тӱҥ сийжылан мелна шотлалтеш. Арам огыл ожнысек ойлат: «Ӱярня йор-йор-йор, мелна чож-чож». Кече гай йыргешке мелна кышыл Ӱярня арнян кажне ешыште эн кугу чес семын ӱстелым пойдара. Мелнам чеверракым да тамлыракым кӱэштыныт гын, шушаш ийыште илышышт уланрак лиеш манын шотленыт.
Ӱярня мелнам ямлымышт да пайрем нерген икмыняр еҥын ойлымыж дене палдарена.
Елена ГРОМОВА, Советский район Кукмарий («Весела кумыл» ансамбльын участницыже):
– Коҥгам уке гынат, Ӱярнялан мелнам кӱэштде ом код. Газ плиташте ик кечын ик тӱрлым, вес кечын вестӱрлым кӱэштам. Утларакшым – вичкыж мелнам. Руашым шӧреш але кӱчымторыкеш лугалтем, рум кучылташ ом тырше. Ушкалым ашнена, чывым ончена, сандене шӧр-торыкшат, муныжат шкенан. Арня мучко кажне кечынак мелнам кӱэштам. Икымше кечын, сортам чӱктен, Юмылан пелештем. Шӱжарем ден кокам мемнан сурт деч тораште огыл илат, унала толын каят, мыят нунын деке миен толам. Такше марий пайремым пайремланак шотлена: ешем шыл да тувыртыш когыльо, салмамуно, мелна дене эреак сийлаш тыршем. Кевытыште ужалыме тыгыде когыльым шуэн наледем. Лучо шке кӱэштам, шонем. Адакшым мыйын почешем ӱдырем-шамыч ыштыш-кучышлан тунемыт.
Ялыштына Ӱярня пайрем 17 мартыште эртаралтшаш. Ме тушто ансамбль дене выступатлаш тӱҥалына.
Любовь ОСИНИНА, Кужэҥер район Старсела, библиотекарь (Советский район Ӱшнур школ):
– Мӧҥгыштӧ шешкым шӱрашан мелнам, а мый вичкыж мелнам кӱэштынна, тувыртыш дене пареҥге подкогыльым ыштенна. Унала тений нигушкат миен огынал. Ялыште кызытеш шып, пайрем йӱк-йӱан ок шокто. Школышто Ӱярня рушарнян веле лиеш. 21 мартыште тунемше-влак дене Морко район Унчышко Йоча ӱярняшке каена.
Валентина ВАСИЛЬЕВА, Марий Элын калык туныктышыжо (Морко район Коркатово лицей):
– Чаманаш логалеш, Ӱярня арня мыланем моло арня гаяк. Моло семынак мелнам кÿэштынам. Унала кошташ жап ок сите, да кызытсе пагытыште тидым пешыжак келшышылан ом шотло. Школлаште йоча-влак дене модмашым эртарат. Мемнан лицейыштат 5–7 класслаште тунемше-влак кандырам шупшын, кирам нӧлтен, ватрушкым шупшын, ӱштервоштыр дене куржын ӱчашеныт. Ваш-ваш ӱян мелна дене сийленыт. Унчо школын тунемше ден туныктышыжо, верысе тÿвыра пашаеҥ-влак чумыр Марий Элысе тунемше-влакым Ӱярня таҥасымашке вучат. Унчо кундемлан тыгай суапле пашажлан таушташ веле кодеш.
Анатолий СЕМЕНОВ, Санкт-Петербург ола:
– Ӱярням ме веселан, икте-весе деке унала коштын эртарена. Тыште Марий Эл гыч ятыр земляк уло.
Мелнам кочкаш мый моткоч йӧратем. Арня мучкак кӱэштына: ик кечын Августа пелашем кӱэштеш, вес кечын – мый. Руашлан кевытыште налме шӧрым да кефирым кучылтына, кунамже руашым шукташ шындена. Мелнажым тӱрлым: кӱжгӧ ден вичкыжым, кугум да тыгыдым ыштена. Пелашемын мелнаже кружева гай лектеш. Ӱмбалыш, ӱйыш, вареньыш, Марий кундем гыч кондымо мӱйыш тушкалтен кочкына. Изием годым ялыште тыгай тамлыже, сакыр ложаш деч молыжо, пеш логалын огыл.
Ӱярня пайрем годым ялыште, шарнем, телым ужатат ыле. Калык жапым пеш веселан эртарен.
Унала толза, тутло пушкыдо мелна дене сийлен колтена!
Л.Семенова
Фотом еш альбом гыч налме
