Таче, 7 майыште, Владимир Путин Россий Федерацийын президентше должностьыш официально шогале.
Тидлан пӧлеклалтше торжественный церемоний Кремль дворецын Андреевский залыштыже эртыш. Тӱҥалтыште Владимир Путин элнан чыла регионыштыжо илыше калыклан тудлан ӱшаным ыштымыжлан тауштыш. Шочмо элна верч специальный военный операцийыште кредалше-шамычлан вуйжым савыш.
Выступленийже мучаште каласыш:
– Ме иквереш чыла чарак гоч эртена, чыла шонымым илышыш пуртена. Ме пырля сеҥена!
Соборный площадьыште Российын Президентше, Россий Федерацийын Вооруженный Вийжын Верховный Главнокомандующийже Владимир Путинлан Президент должностьыш шогалме амал дене Президент полк дене палдарышт. Кугыжаныш вуйлатыше полкым тудым ыштымылан 88 ий темме дене саламлыш.
Кремльын Благовещенский соборыштыжо Москван да Уло Русьын Патриархше Кирилл благодарственный молебеным эртарыш. Молебен деч вара Патриарх Владимир Путиным благословитлыш. Президентлан каласыме мутшо ден тыланымашыже моткочак чонеш логалше улыт ыле. Патриарх Кирилл калыкын тудлан ӱшанымыж нерген ойлыш. Да палемдыш: «Ме Тендан верч чот кумалына».
Л.Камалетдинова
