Эртыше кечылаште Йошкар-Олаш элнан чодырам эн сайын руышыжо-влак таҥасаш толын каеныт.
Марий рӱдолаште профессионал мастарлыкым тергыме, регион-влак кӱкшытан «Чодырам руышо – 2025» кугу конкурс эртен. Тушко ушнышо-влак кокла гыч эн сайын чодырам йӧрыктышым, харвастер ден форвадерын эн сай машинистше-влакым да автомобиль шассиан гидроманипуляторын эн сай операторжым ойыреныт. Таҥасымаш кок кече да кок вере эртен: Юл кундем кугыжаныш технологий университетын тунемме-опытный участкыштыже да Ленин лӱмеш площадьыште. Конкрусын организаторжо-влак Юлтехуниверситет, Марий Элын Пӱртӱс поянлык, экологий да йырым-йырысе средам аралыме шотышто министерстве да республикын Чодыра дене пайдаланыше-влакын ушемышт лийыныт.
Таҥасымашке Марий Эл, Татарстан, Башкортостан, Чуваший, Карелий республикыла, Брянск, Нижегородский, Владимирский, Киров ден Свердловск областьла гыч участник-влак толыныт. Тунемме-опытный чодыра участкыште мо ышталтымым ужаш логалын огыл, но Ленин лӱмеш площадьыште «шокшо» лийын. Тергымаш-влак оҥайын эртеныт. Участник-влакымат, чодыра пашам ворандараш полшышо у техникым кузе виктарымымат эскераш йӧн лийын. Поснак команде-влакын эстафетышт моторын эртыш. Тидым те фотографнан пашалаш гочат ужын кертыда.
– Мый тыгай таҥасымашке ынде ятыр ий почела ушнем, кажне гана сай шарнымаш кодеш, – палемдыш тений Меман республике гыч пушеҥгым эн сайын йӧрыктышыш лекше Константин Афанасьев. – Мардежан игече изишак мешаен гынат, Марий Эл гыч рвезе-влак шкеныштым сайын ончыктеныт. Кеч соперник-влак чынжымак виян лийыныт. Но тыгай конкурсышто нунын дечат шуко молан тунемаш лийын.
Юлтех университетын командыже таҥасымаште начар огыл лектышыш шуын. Мутлан, пушеҥгым йӧрыктымаште тунемме-производственный пӧлка вуйлатыше А.В.Кренёв кумшо верыш лектын гын, ший медаль-влакым тунемме-опытный участке гыч Ю.В.Рыбаков харвастер ден форвадерын машинистше-влак конкерсын общий зачётыштыжо сеҥен налын.
Жюрин иктешлымашыже почеш сеҥышыш теве кӧмыт лектыныт:
- «А-Транс» ООО гыч Константин Афанасьев – Марий Элысе участник-влакын категорийыштышт пушеҥгым эн сайын йӧрыктышӧ
- Чуваший гыч Евгений Шурнеев – Юниор-влак категорийыште пушеҥгым эн сайын йӧрыктышӧ
- Чуваший гыч Артем Шашков – Профессионал-влак коклаште пушеҥгым эн сайын йӧрыктышӧ
- Юлтех университсетын участкыж гыч Алексей Попов – харвастерын эн сай машинистше
- Марий Эл гыч Денис Татаринов – форвадерын эн сай машинистше
- Ю.С.Ашаев – автомобиль шассиан гидроманипуляторын эн сай операторжо.
Светлана Носова
Михаил Скобелевын фотожо.
