9–10 июньышто Йошкар-Олаште «Марий юмыйӱла: эртыме корно да кызытсе жап» всероссийский шанче-практик конференций лиеш. Тудым эртарымашке Марий Элын Тӱвыра, савыктыш да калык паша шотышто министерствыже, Йылмым, сылнымутым да историйым научнын шымлыше В.М.Васильев лӱмеш марий институт, Марий кугыжаныш архив ушненыт.
Шанче форум тений увертарыме Российысе калык-влакын тӱвыра поянлыкыштын идалыкшылан пӧлеклалтеш. Ончылгоч палемдыме почеш, тушто марий юмыйӱлан эртыме корныжо, калыкнан виян толмаште, художественно-простветительский пашаште, тоштер кумдыкышто рольжо, моло конфессий дене вашкылже, тӱрлӧ вере илыше марий-влакын икгайлыкше да ойыртемже да моло неренат йодыш-влакым каҥашаш тӱҥалыт. Тушко Марий Элысе шанчызе, юмынъеҥже-влак деч посна Одо, Чуваш, Пошкырт, Свердловск, Пермь, Мордва кундемла, Моско ола гыч ушнаш кумылым ончыктыеныт.
Кок кечаш мероприятийын программыжат поян. Пленарный заседаний деч вара форум шке пашажым кок секцийыште шуйышаш. Кокымшо кечынже участник-влакым Советский районысо «Марий кумалтыш» юмыйӱла общинын Курык Кугызалан кумалтышышкыже намиен коштыктат.
С.Носова
