Тушто илыше Фанис Хафизов – тале кидмастар – мемнам порын вашлие. Тудо Москош, касвелыш вахте йӧн дене водительлан пашам ышташ коштеш, а пелашыже Надежда Викторовна – кевытче.
– Ешыште кок ӱдыр икшывына, кок уныкана улыт, – ойла Фанис Харисович. Хафизовмыт пӧртым чоҥаш мландым кычалыныт да шкан келшыше верым лач тыште, Эҥерымбал уремыште, ойыреныт. Чылаже 32 сотык.
Кудывечыште ару – суртоза лумым эрыктен шынден. Фанис Харисович у мончажым моктанен ончыктыш. Коҥгашкыже кум пучым келыштарен, тыге тудым олтымо годымак коҥгасе шокшо юж монча кӧргым пеш писын ырыкта. Омсам пенофол дене шокшемден.
Вӱтам нӧлтенна, – умбакыже мутшым шуя суртоза. – Тунам, презым,
шорыкым, чывым ашнаш шонена, а ончыкыжым комбигымам налаш кумыл уло. Пӧрт шотышто ойлаш гын, кермыч дене чоҥаш шоненна, но вара тиде шонымаш вашталте. Палымем калиброватлыме брус гыч ышташ темлыш – шулдырак лекте. Суртын кумдыкшо – 135 квадрат метр. Палемдыман, тыгай пӧртым пеш сайын ончыман да кучыман. Тӱжвачын «Тикурилла» финн лак дене чиялтенна, но тидын деч ончыч – грунтовко, вара – тыгаяк лӱман пропитке. А кӧргыштӧ «Баритекс» тӱсдымӧ чех лакым кучылтмо. Пӧртым ик бригаде дене кок тылзыште погенна. Пырня мучашыште да паз олмышто пӱчкын шындыме. Тиде лӱмын ышталтын: кунам пырня кошка – печкалтеш, шелеш. Но эн сай пушеҥгын пеҥгыде ужашыжым тӱжвачын пужарен шуэныт. Туге гынат илена, кызыт огына кылме. Пӧртыш пӱртӱс газым, вӱдым, электротулым пуртымо. Суртышто тӱҥ шотышто температур – 21 градус шокшо.
Мыят шижым: пӧрт кӧргыштӧ чынжымак шокшо.
– Мый мончам йӧратем, южгунам кум ганат пурем, – воштылалын пелештыш Фанис. – Илыме ӱмырыштем кум мончам ыштенам.
Мончам ончен лекмеке, мутланымашна адакат сурт нерген шуйныш.
– Теве пырнясе паз коклашке джутым пыштыме –умбакыже палдара суртоза, – Вара чыла вере чот конопатитленам: тӱжвач да кӧргӧ могыр гычат… Лӱмын герметик дене йыген ыштыме – шов деч посна. Пу пырнялан келыштарен ыштыме. Тыге тӱжвачын кайык-шамыч регенчым, джутым, кӱрын луктын огыт керт. Туврашым вичкыж оҥа дене петырен шынденам. Тувраш марте – 2.8 метр. Кокымшо пачашыште малыме верым келыштарыме. Тушко тошкалтышым шкеак погенам. Оза семын палемдем: малыме вер тазалыклан пайдале лийшаш. Сайлан садак кермыч суртым шотлем: вӱдыжгылыкым ок пурто, тудым ончаш шагалрак окса да жап кӱлыт. Пӧртнам эше тӱжвачын сайын сылнештарыман, верандыште пластик окнам сакаш кӱлеш, уремыште палисадникым ыштыман.
М.СКОБЕЛЕВ
