Йошкар-Олаште эртыше Пеледыш пайремын ик эн шарнымашеш кодшо мероприятийыже Чарла кремлыьыште эртен. Тушто марий тӱран тӱрлӧ вургемым ончыктеныт. Лӱмын ончыкташ гына ямдылымым огыл, тӱрлӧ кундемыште илыше марий-влак тудым тыглай кечынат, пайремланат, концерт дене выступатлымышт годымат чият. Российын ятыр регионыштыжо илыше марий-влакын мутланымыштат, койышыштат, чиемыштат икте-весышт деч ойыртемалтеш. Тидым кремльыш пурышо турист-шамыч дене мутланыме годымат колаш логале.
Фестивальыш Марий Элын Морко, Оршанке районлаже, Йошкар-Ола, Пошкырт республик, Свердловск область гыч толшо-влак ушненыт. Шарнымашеш кодыч Свердловск область Красноуфимск район Сарсаде кундем гыч тыгаяк лӱман вокально-хореографический ансамбльын участницыже-влак. Ты районысак Юа села гыч Тамара Костина, Роза Андреева шке кундемысе марий ӱдырамаш-влакын пайремлан чийыме вургемыштым, вуйчиемыштым ончыктышт. Уна-влакын ойлымышт почеш, ты кундемыште марий вургемым илалше-шамыч тыглай илышыштат кумылын чият, а рвезырак калык тӱҥ шотышто пайремлан гына. Тусо тӱвыра пӧрт пелен «Марий пӧрт» тоштерыштат уло. Отышкат кумалаш лектыт. Шукынжак огыл, но лектыт, Марий кечышот дене келшыше йӱла пайрем-шамычымат тушто эртарат.
Ӧрыктарыш Йошкар-Ола гыч Мария Сайранован вуйлатыме «Матрёшка» модо театр. Изи ийготан ӱдыр-влак сценыш лекшашлык марий шӱлышан вургем коллекцийым ончыктышт. Кажне костюмжо ойыртемалтше, тӱрлӧ йӱла дене кылдалтше, шуко сылнештарышым кучылтмо, эсогыл южылан вуйчиемым келыштарыме. А коллекцийжым эше пеш самырык дизайнер Ульяна Загайнова ямдылен. Изи модель-влак кажне костюмжым профессионал семынак ончыктеныт.
Морко районысо Унчо кундем гыч Любовь Фёдорован вуйлатыме «Порсын кумыл» мастерскойын ямдылыме пайрем вургемымат ончаш толшо-влак сайын вашлийыныт. Кажне тувыр-шовыржым кид дене тӱрлымӧ марий тӱр дене сылнештарыме лийын.
Фестивальыште шке усталыкым ончыктышо марий фольклор коллектив- влакынат вургемышт куандарен да тыгай сынанракым шкалан ышташ кумылаҥден манашат лиеш.
Снимкылаште: «Матрешка» театр модо; Юа кундем гыч толшо «Эр вий» ансамбль; Сарсаде гыч толшо-шамыч, «Эрвел мари» фольклор ансамбль.
С.Носова
Снимкыште: Юа гыч толшо уна-влак.
Авторын фотожо.
