Марий талешке кечым марий калыкын илыме кажне гаяк кундемыштыже кумдан палемдышт, тыгак Пошкырт велнат. Чыла шотыштат поян ты республикыште моло йылме дене мутланыше 100 тӱжем утла эргыж ден ӱдыржӧ коклаште марий-шамычат келшен илат, пашам ыштат, элнам сылнештараш уло вийыштым пуат. Сандене шочмо калыкнан талешкыже-влакым чапландараш, кумданрак палдараш манын, ты кечым эртараш «Мари ушем» мер организацийын активистше-влак да республикысе Марий тӱвыра рудёрын творческий группыжо тушко да Урал кундемыш миен коштыныт. Рӱдер директорын алмаштышыже Василий Петровын вуйлатыме тӱшкаш, Марий Элын сулло журналистше Борис Шамиев да самодеятельный композитор, бард мурым йоҥгалтарыше Геннадий Григорьев кумылын ушненыт.
Икымше вашлиймаш Бирск олаште эртен. Уфасе наука да технологий университетын Бирскысе филиалыштыже марий шанчызе, студент, ты олаште да кундемыште тыршыше мер пашаеҥ-влак погыненыт. Вашлиймаш Марий Элын калык писательже Леонид Яндаковын «Ший калык» кнагаж дене палдарымаш гыч тӱҥалын. 90 ийым темаш ямдылалтше сылнымут мастарнам шкенжымат Талешке манын кертына. Презентацийым ямдылыше Василий Петров автор нерген поян материалым поген, видео да кино телепарадачыла гыч ужаш-влакым чумырен, герой дене шуко жап пырля пашам ыштыше еҥым, лӱмлӧ журналист Борис Шамиевым, ӱжын. Геннадий Григорьев гитар почеш йоҥгалтарыме мурыжо-влак дене вашлиймашым пойдарен. Пӧлек шотеш шуко марий книгам кучыктеныт.
Вашеш филологий шанче кандидат-влак Алена Илиева ден Серафима Апсатарова тауштен ойленыт. «Бирск марий» национально-культурный автономийым вуйлатыше, район-влак кокласе эмлымверын хирургшо Дмитрий Ибашев, паралимпийский модмашын чемпионжо Кирилл Михайлов, вузын преподавательже Галина Сайсанова оласе мер илыш дене палдареныт. Кызытсе эн кугу пашашт – специальный военный операцийылан мо дене гынат полшаш. Дмитрий Ишмаевичын ойлымыж почеш, олаште да районышто илыше калык СВО-што улшо землякышт-шамычлан ик гана веле огыл полышым колтеныт. Марий Эл гыч мийыше-влак СВО-ш кайыше эрвелмарий рвезе-влаклан ямдылыме салтак вургемыш пижыктыме марий тамган шевроным кучыктеныт. Палемдыман, тысе автономийын тыршымыж дене вашке олаште Келшымаш пӧрт почылтеш. Олан рӱдӧ площадьыштыже марий сатум ужалыше «Эрвий» кевыт почылтмо нерген уверат куандарыш.
Вес вашлиймаш Мишкан район, Яныш Ялкайн лӱмеш марий Чорай национальный гимназийыште кугу пайрем семынак эртен. Тунемше деч посна лӱмлӧ селаште илыше марий-влакат шукын погыненыт. Марий Элын калык писательже Л.Яндаковын творчествыж дене палдарыме дене пырля, оза-влак шкештат мастарлыкыштым ончыктеныт.
Ош Виче ден Чолман эҥер-влак ушнымаште верланыше Эльян посёлкыштат уна-влакым чот вученыт. Тушто Марий талешке кече дене келыштарен, Башкортостанын да Марий Элын сулло артисткыже, мурызо Полина Итальеван усталык касшым ямдыленыт. Краснокам райрӱдысӧ тӱвыра полатыште тудын дене пырля эше пашам ыштыше икмыняр творческий коллектив погынышо калыкым куандареныт. Марий Эл гыч мийыше-шамычат нуным Марий талешке кече дене саламленыт, пӧлекым кучыктеныт, шке усталык койышымат ончыктеныт.
Марий Эл гыч толшо шерге уна-влакым пошкудо кундемыште лишыл еҥ семынак вашлийын ужатеныт. Ик кечыште кум вашлиймашыш шуаш – тидыжат мемнам кумылаҥден. «Вес гана вашлиймешке!» гына манаш кодеш.
Петышкан Вачи
Фотом В.Петровын соцкыл лаштыкше гыч налме.
