Рӱдӧ телевиденийын каналлаштыже сайлымашын ик кечынже Татарстанысе Балтаси райрӱдысӧ избирательный участкыш марий ӱдыр ден каче сӱан дене пурен лектыныт манын увертарышт. А чынжым гын, ты кечын у ешым регистрироватлыше мужыржо Марий Турек районысо Сардаял гыч Оксана ден Дмитрий Кузнецовмыт лийыныт.
Балтаси ЗАГС-ын пашаеҥже-влакын племдымышт почеш, нунын деке Марий Эл гыч мужыр-влак чӱчкыдынак возалташ мият. Сардаялжат 20 километр тораште гына верланен. Верысе калык тудым кокымшо райрӱдылан шотла манаш лиеш. Марий сӱан – тиде эре мотор йӱла. Пайрем вургемым чийыше, рӱжге мурышо да куштышо вате-марий-влак, чынжымак, пеш кертыч, Интернетыште куанен ончышым. Россий президент В.Путинын 2024 ийым лачшымак Еш идалыклан увертарымыжланат ты событий келшен толын.
Мо оҥайже, Россий ЦИК-ын увер рӱдерже Санкт-Петербург, Моско олалаште, Самара, Астрахань да икмыняр моло областьыште ты кечын ушнышо самырык мужыр-влакын сайлыме участкылаш мийымышт нерген палдарыше фото-влакым ончыктеныт. 17 регионышто тыгай сӱрет лийын, увертарен ЦИК вуйлатыше Элла Памфилова.
Весат оҥай ыле: ты кечын сайлымаш участкыштак але, тушеч лекмеке, пелаш лияш темлымашым ыштыше каче-шамычат ятырын лийыныт. Ик тыгай случайже Параньга посёлкыштак лийын. Рамис лӱман рвезе, Марьяналан илыш пелаш лияш манын, шӱмжым да кидшым темлен. Каче ӱдырын участке гыч лекмыжым вучен шуктен, ик пулвуйыш сукалтен да пеледыш аршаш дене пырля шергашым кучыктен. А тыгай темлымашлан могай ӱдыр тореш лиеш?
С.Носова
Снимкыште: Сардаял гыч пиалан мужыр – ЗАГС-ыште.
Фотом Балтаси ЗАГС-ын соцкыл лаштыкше гыч налме.
