Но тиде эше шонымаш веле. Эртыше кечылаште Мер Каҥаш «Марий паркым» ышташ шонымашым 2023 ийлан «Ола сынан кумдыкым тӱзатымаш» программыш пурташ темлен. Ты шотышто Йошкар-Ола администрацийыште кугу каҥашымаш эртен.
Эн ончыч «Ола сынан кумдыкым тӱзатымаш» программе нерген ушештарыман, очыни. Тудым илышыш шыҥдарен толмылан кӧра марий рӱдолаштына веле огыл, республикысе моло олаштат ятыр урем, бульвар, кудывече тӱзаталтыт, у сыным налыт. Икманаш, калыклан илаш, канаш йӧнанрак лиеш. А тӱзатышашлык вержым идалык тӱҥалтыште оласе калык шке ойыра. Теве тений тыгай темлымашым Йошкар-Оласе администраций 19 январь гыч погаш да каҥашаш тӱҥалын. Программын йодмашыжлан келшен толшо ты але вес темлымашым 100 утла еҥ сайлан шотла гын, нуным тӱзаташ палемдыме спискыш пуртат. Вара нунын шотышто рейтинг йӱклымашым эртарат. А темлымашыжым администрацийыш 18 февраль марте blagoustr_gorod@i-ola.ru электрон почтыш але тыгай адрес дене возен колташ лиеш: Йошкар-Оласе Ленинский проспектын 27ше №-ан пӧрт.
«Марий парк» деке пӧртылына. Тыгай парк шке жапыштыже кызытсе Чарла кремль олмышто лийын. Тушко кажне кастене, манаш лиеш, самырык-влак погыненыт, пырля мурен-куштеныт, жапым веселан эртареныт. Чарла кремльыштат кызыт Марий тӱвыра рӱдер тыгай кас-влакым эртара, но ончычсо «Марий паркын» чапшым садак ӱмылтен ок керт манман, очыни. Эшежым Йошкар-Олаштына кызыт марий-влакын лӱмын пырля жапым эртараш погынымо верже семын марий шӱлышан мероприятий-влакым гына ончыкташ лиеш, очыни.
Теве ынде Мер Каҥашын, Йошкар-Оласе марий-влакын чолга еҥже-влак посна «Марий паркым» ышташ темлат. «Марий паркым» веле огыл, тыгай лӱман национальный комплексым. Тудым шонымо семын тӱзаташ лачшымак «Ола сынан кумдыкым тӱзатымаш» программе полшен кертеш ыле. Мер Каҥашын еҥже-влак тудым Сомбатхей микрорайонышто верланыше «Тазалык аллей» воктенысе кумдыкышто темлат. Тусо вер-шӧржат тидлан келшен толеш. Каҥашымашке Марий Эл правительстве председательын икымше алмаштышыже Михаил Вастютинат ушнен. Тудо палемден: Йошкар-Олам Россий Федерацийын субьектшын рӱдолаже семын веле огыл, тыгак Марий автномийын рӱдолаже семын ончыман. «Марий парклан» темлыме кумдык пӱртӱс лоҥгаште лийшаш. Тудо национальный пайрем-влакым, тӱрлӧ йӱлам эртараш келшен толшаш. Тушто марий сем, почеламут-влак йонгалтшаш улыт.
Йошкар-Олаште илыше марий-влак рӱдолаштына «Марий паркым» ышташ шонымаш дене тӱрыс келшат, да тудым Мер Каҥашлан илышыш шыҥдараш полшаш кумылын келшат манын, моткоч ӱшаныме шуэш. Чыным каласаш гын, ты программе полшымо дене рӱдоланам марий сынаным ышташ лиеш. Но кызытеш ты йӧнжӧ дене ик гана веле пайдаланена, лектеш: индешымше микрорайонышто П.П.Глезденев лӱмеш скверым тӱзатыме…
С.Носова
Снимкыште: каҥашымаш годым.
Фотом Йошкар-Ола администрацийын сайтше гыч налме.
