«МАРИЙ ЭЛ» ТАЧЕ

Марий рӱдолаште – эн кугу Сабантуй

2024 ийыште федерал кӱкштыштӧ XXIV Сабантуй пайрем Марий Элыште лиеш.

Тидын шотыштак оргкомитетын икымше заседанийже эртен. Тушто регион вуйлатыше Юрий Зайцев, Татарстан Республикын премьер-министржын алмаштышыже, Тӱнямбал татар конгрессын национальный советшын председательже, оргкомитет вуйлатышын алмаштышыже Василь Шайхразиев да Тӱнямбал татар конгрессын да мер организаций-влакын еҥышт лийыныт.

«Эше ик ий уло гынат, мероприятийын кӱкшытшым шотыш налын, ме тудлан ончылгоч ямдылалташ тӱҥалынна. Тудым сай кӱкшытыштӧ да эн сай шарнымашым гына кодышо, унам вашлийын моштымым ончыктышо пайрем семын эртарышаш улына», – палемден погынышо-влак дене саламлалтшыжла Юрий Зайцев.

Василь Шайхразиев татар-влакын кушто мыняр илымыштым шотыш налын гына огыл, мероприятийын кӱлешлыкшымак да тудым эртараш ыштыме  планым сайын ямдылымым палемден.

Пайрем Медеведево районысо Руэм ипподромышто кок кече эрташ тӱҥалеш. Медведево муниципал район администраций вуйлатыше Денис Окуловын ойлымыж почеш, шушаш жапыште тудым уэмдаш палемдыме. Национальный пайремын йӱлаже-влакым эртараш ешартыш у алан-влакым келыштарат.

Марий Элын тӱвыра, савыктыш да калык-влакын пашашт шотышто министр Константин Ивановын палемдымыж почеш, Йошкар-Олаште федерал кӱкшытыштӧ ты пайрем икымше гана 2002 ийыште эртен. Тунам рӱдолашкына чылаже Российын 45 субъектше гыч еҥ-влак толыныт улмаш. Сандене вес ийынат мыланна Российын тӱрлӧ лукшо гыч уна-влакым вашлияш кугу пиал лиеш, каласен тудо.

Заседанийыш погынышо-влак шушаш кугу этнокультурный событийын Российысе калык-влак коклаште кылым пеҥгыдемден да тӱвыра-влак кокласе диалогым вияҥден кертмыжым палемденыт.

Марий Эл вуйлатышын администрацийжын информаций паша пӧлкажын уверже негызеш С.Носова ямдылен.

Опубликовать в Одноклассники

Добавить комментарий