15 апрель гыч 30 май марте «Оласе йырвелым йӧнаным ыштымаш» федерал проект почеш 2023 ийыште могай кумдыкым тӱзатышаш верч йӱклаш тӱҥалына. Йошкар-Олаште 24 проектым ойырен налме.
Нунын коклаште иктыже – Ленин проспектысе Марий парк. Шукынжо палат, Ленин садыште верланыше ончычсо Марий парк марий калыкын мурен-куштен чоным кандарыме верже лийын. Кызыт тудын олмышто – Чарла Кремль. Йошкар-Олаште Марий паркым уэш почаш пеш сай йӧн пуалтын: Всероссийский йӱклымашке ушнен, эн шуко йӱкым погена гын, проект дене келшышын, шагал огыл шийвундо ойыралтеш.
«Йошкар-Оласе марий погынымаш» мер ушемын еҥже-влак, кодшо кушкыжмын Йошкар-Ола администрацийыш погынен, лач тидын нерген каҥашеныт. Марий парк марий калыкын веле огыл, а республикыште илыше чыла тӱрлӧ калыкын пырля чумырген, каныш жапым веселан да пайдалын эртарыме верышке савырнышаш. Сандене йӱклымашке ушнаш кеч-кӧмат ӱжына, – тыгай ойыш шуыныт нуно. Мом ыштыман? Кумылан еҥ, za.gorodsreda.ru. сайтыш пурен але Госуслуги гоч единый платформышто шке йӱкшым онлайн пуышаш. Йошкар-Олаште веле огыл, Марий Элысе кажне районышто, чумыр Россий кумдыкышто илыше тидым ыштен кертеш.
– Марий-влакше иктат ӧрдыжеш кодшаш огынал. Кажне еҥ шке родыжым, пошкудыжым, палымыжым ушышаш, – каласен «Йошкар-Оласе марий погынымаш» мер ушемын вуйлатышыже Валерий Мочаев.
Л.СЕМЕНОВА
Снимкыште: тиде Марий паркым шукын шарнат. Фотом интернет гыч налме.