Йошкар-Оласе Марий паркыште пу гыч пӱчкеден лукшо кидмастар-влакын «Марий калыкын легендыже-влак» фестивальышт эртен. Икымше этапыште эскизым онченыт. Конкурсыш 10 утла эскиз пурен. Йошкар-Олан администрацийже тушеч эн сайжым ойырен налын. Фестивальыш шым кидмастарым ӱжыныт. Нылытше Марий Эл гыч лийыныт, тыгак Мордва, Удмурт республикла, Чебоксар ола, Пенза кундем гыч толыныт. 6 гыч 10 август марте нуно парклан келшыше скульптурым ыштеныт. А 11 августышто «спид камент», писын пӱчкеден моштымо таҥасымаш, лийын. Тушто ик метрат пеле кӱкшытан пырня гыч мастар-влаклан ик шагатат пеле жапыште скульптурым ыштен шуктыман. Чыла скульптурым Марий парклан лӱмын ыштыме. Ӱшанена, турист-влакат, Марий Элыште илыше-шамычат кидмастар-влакын пашаштым ончен куанаш да нунын мастарлыкышт дене кугешнаш тӱҥалыт.
Таче газетнан лаштыкыштыже ме тиде фестивальын икмыняр геройжо дене лишкырак палыме лийына.
Эн самырык кидмастар – Кужэҥер район Саламатнур ял гыч 26 ияш Дмитрий Смородинов.
– Мый Йошкар-Оласе калыкле президент-школышто тунемынам. Вара Москош каенам. Тушто пу гыч пӱчкедыме пашалан умбакыже тунемынам. Москваштак Владимир Николаевич Алманов дене палыме лийынам. Тудын деч тений Йошкар-Олаште пу гыч пӱчкедыше мастар-влакын оҥай конкурсышт эрташ тӱҥалеш манын колынам. Ондак Мордовийыш, Саранск олаш, конкурсыш миенам.
Конкурсышто пайдаланыме тӱҥ инструментна товар, бензопила да стамеске лийыныт. Мый «Юмынӱдыр» скульптурым ямдыленам. Пушеҥгым шӱмленам, размер почеш бензопила дене пӱчкеденам. Вара, стамескым налын, пырнялан скульптуремын тӱсшым пуртенам. Юмынӱдырлан вургемым, ӱпым ыштенам, – пашаж нерген изишак каласкалыш Д.Смородинов.
Конкурсын организаторжо Владимир Алманов денат мутым вашталтышна. Тудо ондакак Марий Элыште тыгай таҥасымашым эртараш шонен.
– Фестивальым илышыш шыҥдараш полшымылан республикысе правительствылан, Йошкар-Олан мэрийжылан кугу таум каласыме шуэш. Мыят конкурс эртыме жапыште изи скульптурым пӱчкеден луктынам. Ты композиций Курыкмарий мланде дене кылдалтын. Пашамым Йошкар-Оласе ик тоштерыш пуаш шонем, – мане В.Алманов.
А фестивальын конкурс ужашыштыже жюри Шернур район Ондроп починга ял гыч Владимир Антроповын «Изи Онар» скульптуржым эн сайлан шотлен.
Владимир Михайлович Антропов пу гыч пӱчкедыме пашалан ӱмыржӧ мучко тунемын. Ончыч президент школ-интернатыште, вара Богородский училищыште «Резьба по дереву» специальностьым налын.
– Композициемын тӱҥ геройжо – изи Онар. Тудым ачаж ден аваже кид копаштышт кучат. Тений – Еш идалык, сандене скульптуржат тиде идалыклан пӧлеклалтын. Конкурслан пырняжым 80 сантиметраным йодынна, конденыт изиракым, 50 сантиметр кутышаным. Но нимат огыл, йӧным муынам. Пу скульптур кужу жаплан чытыже манын, тудым кугу нелытаным, ынже шӱй манын, кӧргыжым пустам ыштенам. Каласыман, пу композиций ынже шелышталт манын, тудым чӱчкыдынрак лак дене чиялтыман. Мутат уке, конкурсышто сеҥымемлан куанем, чылаштлан кугу таум ойлем, – таҥасымаш деч вара куанжым шылтыде каласыш В.Антропов.
Вес тале кидмастар – Новый посёлко гыч Сергей Тихонов. Тудо фестивальыште кокымшо верыш лектын.
– Таҥасымаште сонарзе ӱдыр Иргам пӱчкеден луктынам. Марий калыкын легендыже почеш, Ирга илемышкышт лишемше тушман-влак нерген калыклан шижтарен, – умылтарыш С.Тихонов.
Шупашкар гыч Евгений Акимов «Чодыра озам» ыштен, тудо кумшо верым налын. Мордовийысе Кочкурово район гыч Петр Рябов «Верховный карт мари» скульптурым пӱчкеден луктын. Пенза область гыч Александр Туркичев «Птица-прародительница – Лудо» пашам ямдылен, а Удмуртий гыч Сергей Назаров «Юмынӱдырым» ыштен. Ӱшанена, кидмастар-влакын пашашт калыкым кужу жап куандараш тӱҥалыт да Марий парклан ойыртемалтше тӱсым пуртат.
М.СКОБЕЛЕВ,
Л.ШАБДАРОВА
М.Скобелевын фотожо
