Йошкар-Олана 440 ияш шочмо кечыжым кумдан палемда. Тудо ий гыч ийыш тӱзлана, моторештеш. Ныл курым утла наре пагытыште изи ор (крепость) гыч Российысе ик эн мотор олаш савырнен. Пытартыш жапыште рӱдолана марий сын дене утларак пойдаралтеш. Кок ий жапыште тӱшка вий дене тӱзатыме у Марий паркымак налаш. «Оласе йырвелым йӧнаным ыштымаш» федерал проектлан, чолга марий мер еҥ-шамычлан тау. Проектыш логалаш манын, чотак тыршышт. Паркым тӱрысшак эше тӱзатен шуктымо да официально почмо огыл гынат, сынже кызытак куандара. Олаште илыше да уна-влак, тӱрлӧ калык пӱртӱс лоҥгаште верланыше марий шӱлышан верыш кумылын коштыт.
Толза, ончалза, куаныза, кугешныза! Уло кушто погынаш, пырля тургыжландарыше йодышымат каҥашаш, канаш, пайремым эртараш, чоным куандараш. Республикын кажне районжо дене палдарыше, поян материалым чумырымо стенд-влакшак мом шогат! Российын тӱрлӧ регионыштыжо илыше марий-шамычланат толын, ончал савырнаш куанле лиеш.
Олан лӱмгечыжлан пӧлеклалтше кокымшо кечын кастене Ленин лӱмеш тӱвыра полат пеленысе «Ныжыл сем» фольклор ансамбль (вуйлатышыже Марий Элын калык артистше Нина Макарова) шке усталыкшым ончыктыш. Тӱрлӧ кундемысе марий-влакын вургемыштым чийыше самодеятельный артист-влак гармонь, тӱмыр, шӱвыр почеш мурен-куштышт. Ончаш толшо калык нунын дене пырля лоҥо. Тек ончыкыжымат тыгак лиеш: Марий парк чыла марий, руш, татар, моло калыкымат ушаш тӱҥалеш. А пырля лийына гын, вийнат чылалан шутышо лиеш, кеч-могай неле пагытымат сеҥен лектына.
С.Носова
Сникыште: «Ныжыл сем» фольклор ансамбль – Марий паркыш пурымаште.
М.Скобелевын фотожо
