Йошкар-Ола – мотор ола. Тудо республикнан рӱдыжлан шотлалтеш. Олаштына марий, руш, татар деч посна эше ятыр тӱрлӧ национальностян калык икте-весым пагален, икте-весылан полшен, эҥертен ила.
Тиде каныш кечылаште Йошкар-Олан кечыжым тӱрлӧ площадкыште палемдаш тӱҥалына.
Йолташ-влак, сылне оланан лӱмжым колмеке, чондам могай шижмаш авалта?
Олег КУЗЬИНЫХ, Российын сулло, Марий Элын калык артистше:
– Эн мотор, эн чапле, эн лишыл, эн шочмо олам деч моло нигуштат уке! Тыште ме чыланат икте-весе дене келшен, порын илена. Ӧрдыж кундем гыч толын пурымеке, Йошкар-Олаштына кумыл нӧлталтеш, чонлан ласкан чучеш да мӧҥгыштем вет улам манын, шоналтет.
Григорий АРХИПОВ, Э.Сапаев лӱмеш опер да балет академический театрын тӱҥ дирижёржо, композитор:
– Марий калыкын ятыр курым гоч эртыме кужу да виян корныжо, республикнан вияҥмыже, Йошкар-Оланан сылнештмаштыже палдырна. Марий композитор, поэт, художник, писатель-шамычын мастарлыкышт ий гыч ийыш ешаралт толмыштым мыят сайын шарнем да тидын дене кугешнем.
Виктор АПТАЛИКОВ, мурызо, Марий самырык театрын йӱк режиссёржо:
– Йошкар-Ола – мылам эн лишыл ола, тышан мый шочынам, кушкынам, сандене тудым моткоч йӧратем. Тыште мылам чылажат лишыл да шерге. Элнан тӱрлӧ кундемыштыже лийынам гынат, марий лӱман олана деч чаплыже нигушто уке! Тыште чонланат ласка, вет кажне уремже, пӧртшӧ, кажне лукшо палыме. Тыште мыйын йоча жапем эртен, йолташем, лишыл еҥем-влакат тыште улыт, садлан Йоршкар-Олан кечыжым шерге йолташемын пайремже семын вашлиям.
Йошкар-Олаштына илыше кажне еҥлан оланан иктаж микрорайонжо лишыл. Мылам индешыме микрорайон поснак чот шерге. Тыште мый икымше гана йочасадыш, а вара школыш каенам, тыштак икымше йӧратымашым вашлийынам. Кызыт оланан вес кундемыштыже илем, садлан эртен кудалме годым кажне йолгорныжо мылам палыме да шерге.
Юлия ЯКОВЛЕВА, Морко муниципальный район администрацийын тӱвыра, спорт да туризм пӧлкажым вуйлатыше:
– Йошкар-Ола – республикнан рӱдолаже. Тудо эн мотор, сӧрал да чонлан эн лишыл. Лач тушто 22 ий ончыч йӧратымашым вашлийынам, садлан ты олашке мийыме годым самырык пагыт чоным ырыкта, кумылым нӧлта.
А.БАЙКОВА
Фотом еш альбом гыч налме
