Ушештарена, кеҥеж каныш мучко Икымше-влакын толкынышкышт ушнышо йоча-влак да нунын наставникышт самырык-влаклан республикысе чыла олаште да районышто оҥай мероприятийлам эртарат.
Кодшо кечылаште Шернур районышто Еш, йӧратымаш да ушанлык кечылан полеклалтше конкурс-шамыч лийыныт. Йоча-влак Пётр ден Февронийын илышышт нерген пален налыныт, эн мотор пеледыш аршашым ямдыленыт, кумдан палыме писатель-влакын еш дене кылдалтше шонымашыштым кычалыныт.
Морко районысо самырык-влак кагаз гыч висвис пеледышым ышташ тунемыныт.
Медведево кундемыште «Тайна детства» площадке пашам ыштен.
У Торъял районысо чолга ӱдыр-рвезе-шамыч экскурсий дене Токтарсолаште лийыныт, тыгак «Елена Премудраян теремже» конкурсыш ушненыт, туризмын негызшылан тунемыныт.
Кужэҥер районышто «Кумыл – Кеҥеж» площадкыш погынышо-влаклан руш йӱла дене кылдалтше конкурс-шамыч лийыныт.
Волжск олаште «Уло кудывече дене модына» театрализоватлыме модыш программе почеш ӱдыр-рвезе-влаклан тӱрлӧ модышым эртарыме.
Г.Кожевникова
