Морко посёлкысо 2-шо №-ан школышто марий йылмым да литературым, ИКН-ым туныктышо-влакын район кӱкшытан семинарышт лийын. Тудо верласе школлаште тыршыше 19 педагогым иквереш чумырен.
Семинар «Этнокультур предметлам туныктымаште инноваций тунемме технологий дене пайдаланымаш» теме дене эртен.
Моркысо 2-шо №-ан школын туныктышыжо-влак погынышо-шамычлан почмо урокым, мастер-классым ончыктеныт. Районысо образований пӧлкан пашаеҥже-влакын иктешлымашышт почеш, методике могырым кажныжын пашажым сай могырым палемдыман. Кажныжын урок материалже келге содержаниян, йоча-влаклан шуко шинчымашым пуышо да нунын ийготыштлан келшыше лийын. Кызытсе жаплан келшыше технологийым моштен кучылтыт. Занятий-шамычын темыштат кажныжын кӱлешан да оҥай улыт. Людмила Логинова 3 «б» классыште «Вургем» теме дене иктешлымаш-урокым эртарен. Любовь Сергеева «Марий кундемыште архитектур-планировко йӱла» темым почын пуэн. Надежда Голубкинан «Марий Элем – шочмо верем» темылан урокшо оҥай лийын.
Туныктымо пашаште модыш технологийым кучылтмо эреак лектышан, тыгай сынан урок йоча-влаклан поснак келша, санденак заданийым кумылын шуктат да пуымо шинчымашым сайынрак шарнен кодыт. «Марий йылме уроклаште модыш технологий дене пайдаланымаш» теме дене Маргарита Михайлова выступленийым ыштен. Еш идалыклан пӧлеклалтше «Еш – илыш эҥертыш» внеклассный мероприятийым тӱҥалтыш класслам туныктышо-влак Снежана Александрова ден Людмила Горянова эртареныт. Екатерина Петрован «Шӧртньӧ муно» мастер-классышкыжат семинарыш погынышо туныктышо-шамыч кумылын ушненыт.
Почмо урок, занятий, мастер-класс деч вара Ирина Никифорова школ мучко экскурсийым эртарен. А мучашлан участник-влаклан школын тӱҥалтыш класслаштыже тунемше-шамыч чапле концертым ончыктеныт – марла муреныт, куштеныт.
Г.Кожевникова
Фотом районысо образований пӧлкан сайтше гыч налме
