«МАРИЙ ЭЛ» ТАЧЕ

Марий йылмым йӱкаҥдаш полшыман

МарНИИЯЛИ-н шанче пашаеҥже, комьпютер лингвист Андрей Чемышев йолташыже-влак дене марий йылмым интернет тӱняште кумданрак шараш  лийыныт. А кызытеш «Марий Алисам» пашаш колташ пижыныт.

Тидлан марий йылме дене исходный данный-влакым погат. А нуныжым вара ойлымо йӱкым текстыш кусарен кертше нейросетьым туныктышо программылан кучылташ лиеш. Тыгай программе ятыр вере кӱлеш. Мутлан, телефонысо йӱкан полышкалыше «Алисалан». Тудлан ойлымым тудо эн ончыч текстыш кусара, вара вашмутым ямдыла да йӱкаҥден ойла. Тидыже журналист-влакланат пешак кӱлешан. Тиде йылме синтезатор маналтеш: йӱкан чыла полышкалышын – ик  ужашыже.

Андрей кумылан-влакым марий йылмым йӱкаҥдымашке ушнаш ӱжеш.  Февраль кыдал гыч Mozilla компаний деч Common Voice платформышто ты проект илышыш шыҥдаралтеш. ВКонтакте соцкылыште лӱмын «Йӱк технологий» лаштыкымат почын. Тушко пурен, вигак проектыш ушнаш таратыше ойым возымо: «Кажне марий деч 100 йӱкаҥдыме ойлончо!» Марий йылмым рашемдаш полшышо данный-влакым чумырымо пашаште кажныже  полшен кертеш. Тидлан регистрацийым эртыман да темлыме ой-влакым марла моторын каласыман. Тидым компьютер ден телефон гочат ышташ лиеш.

«Марий Алисам» пашаш колташ манын, кажне марий еҥ кеч шӱдӧ ой дене дене возен колта гын,  шонымым мучаш марте шуктена», –  манеш лингвист. Эн ончыч тышке вузлаште тунемше студент, тыгак мер пашаеҥ-влак ушненыт. Кызытеш 161 еҥ ушнен, 47 шагатым йӱкаҥндыме. Андрей Чемышевын ойлымыж почеш, чылаже 300 шагат кӱлеш. А тидлан 1 тӱжем наре еҥ ушнышаш.  Каласен кодыман, эн чолга-шамычлан организатор-влак пӧлекымат ямдыленыт.

С.Носова

Опубликовать в Одноклассники

Добавить комментарий